2.5 մլրդ դրամ՝ ավտոճանապարհների համար

Այս տարի ավարտվելու են Աղդամ-Մարտակերտ ավտոճանապարհի նորոգման աշխատանքները, օրերս տեղեկացրել է ԼՂՀ քաղաքաշինության նախարար Կարեն Շահրամանյանը՝ կառավարության անդամներին ներկայացնելով պետբյուջեի հաշվին իրականացվելիք ճանապարհաշինարարական աշխատանքները:

Ամենայն հավանականությամբ հաջորդ տարի կսկսեն վերանորոգել Աղդամ-Մարտունի ճանապարհահատվածը: Համենայնդեպս, այդպես էր ասել երկրի վարչապետը դեռեւս Աղդամ-Մարտակերտ ճանապարհահատվածի վերանորոգումը սկսելու ժամանակ:

Տարվա ընթացքում նորոգման աշխատանքներ կկատարվեն նաեւ Ստեփանակերտ-Գորիս, Ստեփանակերտ-Ննգի-Մարտունի, Ստեփանակերտ-Մարտունի եւ մի շարք այլ ճանապարհահատվածներում: Կասֆալտապատվեն Հադրութի շրջանի Մեծ Թաղեր գյուղ եւ Ստեփանակերտ-Ասկերան ճանապարհից Իվանյան, Նորագյուղ տանող ավտոճանապարհները:

Ընդհանուր առմամբ՝ այս տարի պետբյուջեով ավտոճանապարհների վերակառուցման, վերանորոգման եւ պահպանման աշխատանքների համար կհատկացվի շուրջ 2.5 մլրդ դրամ: