Ցանկապատ` Թուրքիայի հետ սահմանին

Փախստականների մուտքը Հունաստան  դադարեցնելու նպատակով Հունաստանը պատրաստվում էր ցանկապատ քաշել Թուրքիայի հետ սահմանին: Նույնը հիմա պատրաստվում է անել նաեւ Բուլղարիան` այս անգամ` Թուրքիայից կենդանիների «ներհոսքը» կանխելու համար:

Բուլղարիան կենդանիների տարբեր հիվանդությունների մուտքը կանխելու համար պատրաստվում է 143 կմ երկարությամբ մետաղական ցանկապատ հյուսել: Սառը պատերազմի տարիներին երկու երկրների միջեւ ցանկապատ եղել է, սակայն հիմա դրա ընդամենը 29 կիլոմետրանոց հատվածն է պահպանվել:

«Դնեվնիկ» թերթին տված հարցազրույցում Ազգային անասնաբուժական ծառայության  տնօրեն Յորդան Վոյնովն ասել է, որ ցանկապատի շինարարության համար բյուջեից գումար է հատկացվելու, ինչը հետագայում կփոխհատուցվի Բրյուսելի կողմից:

Բուլղարիայի այս որոշման պատճառն այն է, որ սահմանամերձ շուրջ 9 ֆերմաներում  մոտ 200 խոշոր  եւ մանր եղջերավոր անասուններ են վարակված, որոնցից 21-ը թուրք «սահմանախախտներ» են: