Հեռուստատեսությունների ներկայացուցիչները չներկայացան

Պահանջարկն է ծնում առաջարկը, մեր հասարակությունը սերիալ է նայում, իսկ սերիալի ընթացքում գովազդն ավելի թանկ արժի, դրա համար էլ սերալն է գերակշռում եթերում: Այսօր լրագրողների հետ հանդիպմանը հայտարարեց Ազգային կինոկենտրոնի տնօրեն Գեւորգ Գեւորգյանը: Վերջինս կարծում է, որ մեզ մոտ հեռուստաընկերություններն ավելի շատ են, քան տարեկան նկարահանվող ֆիլմերի քանակը, դրա համար էլ հատուկ եթերաժամ հատկացված չէ հայկական կինոյին:

Հոգեբան Խաչատուր Գասպարյանն էլ նշեց, որ սերիալներն ունեն եւ դրական, եւ բացասական կողմեր, բայց վտանգավոր է սերիալների պարունակած հաղորդագրությունը, որը կանխամտածված չէ:

«Սերիալների միջոցով մարդիկ մի տեսակ թերապեվտիկ ժամանց են ունենում. հայտնվելով սերալի մեջ` մոռանում են իրենց առօրյա հոգսերը: Բայց վերջերս շատացել է ագրեսիվ դրսեւորումները պատանիների միջավայրում. պատճառներից մեկն էլ սերիալի հետեւանքն է»,-ասաց պարոն Գասպարյանը:

Նշենք, որ կինոկենտրոնի տնօրենը բազմիցս շեշտեց հեռուստաընկերությունների ներկայացուցիչների մասնակցության անհրաժեշտությունը ասուլիսին, սակայն, ինչպես նշեց «Հենարան» մամուլի ակումբի լրագրողներից մեկը, իրենք զանգել են բոլոր հեռուստաընկերությունների ղեկավարներին, բայց վերջիններս խուսափել են մասնակցել քննարկմանը: