Երթ` նվիրված բռնության զոհ Զարուհի Պետրոսյանին

Օրենսդրության թերությունների պատճառով Հայաստանում գրեթե անպատժելի են ընտանեկան բռնությունն ու երեխաների հանդեպ սեռական ոտնձգությունները:

«Երկիր»-ի հետ զրույցում Կանանց ռեսուրսային կենտրոնի սեռական բռնությունների դեմ պայքարի ծրագրի համակարգող Տաթևիկ Աղաբեկյանն օրինակ բերեց ՀՀ քրեական օրենսգրքի 141-րդ հոդվածը, ըստ որի անչափահասի հանդեպ սեռական ոտնձգություն կատարած անձը պատժվում է ուղղիչ աշխատանքներով` առավելագույնը երկու տարի ժամկետով կամ երկու տարվա ազատազրկմամբ:

Չի խոսվում նաև հանցանքի կրկնակիության դեպքում պատժի մասին: Այսինքն` տարբերություն չկա` մարդը մեկ, թե հինգ երեխայի հանդեպ է բռնություն գործադրել:

Նման դեպքի են առնչվել Նուբարաշենի 11-րդ գիշերօթիկ դպրոցում տեղի ունեցած դեպքերի հետ կապված, երբ բռնության ենթարկված հինգ վկա է եղել, այնինչ` սեռական ոտնձգություններ կատարած Լևոն Ավագյանը միայն երեք տարվա ազատազրկման ենթարկվեց, ինչը սպառնում էր նրան միայն մեկ զոհի դեպքում էլ:

Իսկ ընտանեկան բռնության վերաբերյալ ընդհանրապես որևէ օրենք չկա: Ընտանեկան բռնության զոհ է Մասիս քաղաքի բնակիչ քսանամյա Զարուհի Պետրոսյանը, ով հոկտեմբերի 1-ին մահացել է դաժան ծեծի և կտտանքների պատճառով:

Այս դեպքի կապակցությամբ մի քանի հասարակական կազմակերպություններ միավորվել և  ստեղծել են «Ընդդեմ կանանց նկատմամբ բռնության» կոալիցիա, որը հետամուտ է լինելու գործի արդար քննությանը:

Կոալիցիան կոչ է անում ողջ հասարակությանը նոյեմբերի 25-ին, ժամը՝ 15.30-ին միանալ ընտանեկան բռնության զոհերի հիշատակին նվիրված բողոքի երթին, որը կսկսվի Կասկադից:

Երթի մասնակիցները բաց նամակ են ուղարկելու ՀՀ նախագահին, կառավարությանը և Ազգային Ժողովին:

Նաև կազմակերպվելու է ստորագրահավաք, որպեսզի ստեղծվեն կանանց և երեխաների նկատմամբ բռնությունը կանխարգելող և պատժող օրենքներ, և դրանք կիրառելի դարձնելու համար ներդրվեն համապատասխան մեխանիզմներ:

Երթի ընթացքում կազմակերպվելու է նաև դրամահավաք` Զարուհու 1.5 տարեկան դստեր համար: