Խոշոր հրդեհ՝ «Պալաս» առևտրի կենտրոնում․ հայտարարվել է հրդեհի վտանգավորության «ԲԻՍ 1» աստիճան

Այսօր՝ նոյեմբերի 3-ին, խոշոր հրդեհ է տեղի ունեցել Երևանում։ Ժամը 03:55-ի սահմաններում ՀՀ Ներքին գործերի նախարարության 112 օպերատիվ կառավարման կենտրոն ահազանգ է ստացվել, որ հրդեհ է բռնկվել Նոր Նորք վարչական շրջանի Գայի պողոտայում գործող «Պալաս» առևտրի կենտրոնում։

Ինչպես հայտնում է ֆոտոլրագրող Գագիկ Շամշյանը, դեպքի վայր են ժամանել Երևանի տարբեր հրշեջ-փրկարարական ջոկատներից 4 մարտական հաշվարկ։ Տեղում հայտարարվել է հրդեհի վտանգավորության «ԲԻՍ 1» աստիճան։

Դեպքի վայր են ժամանել նաև ՀՀ ՆԳՆ ոստիկանության Պարեկային ծառայության Երևան քաղաքի գնդի 1-ին գումարտակի 3-րդ վաշտի պարեկները՝ գնդի հրամանատարի տեղակալ Գարիկ Ավետիսյանի, գումարտակի հրամանատար Գոռ Առաքելյանի, գումարտակի հրամանատարի տեղակալ Ալբերտ Հովհաննիսյան, վաշտի հրամանատար Գեղամ Եփրեմյանի գլխավորությամբ։

Օպերատիվորեն ժամանել են նաև Երևանի 103 շտապօգնության բժիշկների հերթապահ 2 խումբ։ Բժիշկները տեղում հերթապահություն են իրականացրել, մինչև հրշեջների աշխատանքների ավարտը։

Տեղում պարզվել է, որ հրդեհը բռնկվել է նշված առևտրի կենտրոնի տաղավարներում։

Ըստ նախնական տեղեկությունների բարեբախտաբար տուժածներ չկան, սակայն առևտրի կենտրոնին պատճառվել է խոշոր չափի նյութական վնաս։

Դեպքի վայր են ժամանել նաև ոստիկանության Նոր Նորքի բաժնի հերթապահ խումբը, որտեղ էլ պարզում են, թե ինչ հանգամանքներում է կրակը բռնկվել։