Կյանքի և մահվան սահմանագծին. Սամվել Աղալարյանի լուռ սխրանքը

​Բժշկի մասնագիտությունը հաճախ պատվում է ռոմանտիկ շղարշով, սակայն իրականում այն անքուն գիշերների, հսկայական պատասխանատվության և տաժանակիր աշխատանքի միահյուսում է։ Այս ամենի մասին թերևս ամենից լավ գիտի բժիշկ Սամվել Սերգեյի Աղալարյանը՝ մարդ, ում ձեռքերին ամեն օր տասնյակ կյանքեր են վստահված։​

​Սամվել Աղալարյանը ծնվել է 1980 թվականին՝ գեղատեսիլ Բորժոմիում։ Այնտեղ էլ ստացել է նախնական կրթությունը՝ հաջողությամբ ավարտելով տեղի ռուսական դպրոցը։ Թեև շատերի համար բժշկի ուղին մանկության երազանք է լինում, Սամվելի դեպքում ընտրությունը գրեթե պատահական էր։ Բնական գիտությունների, հատկապես կենսաբանության հանդեպ ունեցած հակումն ու խորը գիտելիքները նրան առաջնորդեցին դեպի Թբիլիսիի պետական բժշկական համալսարան։ Ընդունելության քննությունները հաղթահարվեցին թեթևությամբ, սակայն առջևում մասնագիտական ամենադժվար փորձություններն էին։​

​Այսօր Սամվել Աղալարյանը ճանաչված և սիրված անեսթեզիոլոգ-ռեանիմատոլոգ է։ Հետաքրքիր է, որ սկզբնական շրջանում նա հակված էր դեպի պուլմոնոլոգիան (թոքաբանություն), սակայն ընկերոջ խորհուրդն ու կյանքի հանգամանքները նրան ուղղորդեցին դեպի անեսթեզիայի և ռեանիմացիայի բարդ ոլորտ։

​Արդեն 11 տարի է, ինչ նա իր մասնագիտական հմտություններն ի սպաս է դնում Ջավախքի բնակչությանը։ Աշխատանքային աշխարհագրությունը լայն է՝ Ախալցիխե, Նինոծմինդա, Ծալկա, բայց նրա հիմնական գործունեության կենտրոնը Ախալքալաքն է։ Բժիշկն անկեղծանում է. տարբեր քաղաքներում աշխատելը ոչ միայն պահանջված լինելու արդյունք էր, այլև հնարավորություն՝ մշտապես կատարելագործվելու և բարդ վիրահատությունների միջոցով փորձը հարստացնելու համար։

​«Ռեանիմացիան ամենադժվարն է։ Երբ հիվանդի վիճակը ծայրահեղ ծանրանում է, նրան տեղափոխում են մեզ մոտ։ Ես այլևս տեղափոխելու տեղ չունեմ. վերջին կետը հենց այստեղ է»,- ասում է բժիշկը։​

​Աշխատանքի դժվարությունների մասին խոսելիս Սամվել Աղալարյանը չի թաքցնում՝ այն ծայրաստիճան ծանր է։ Դա մշտական պայքար է մարդկային կյանքի համար, պայքար, որը չգիտի հանգստյան օրեր և ժամեր։ Չնայած այն մտքին, որ հնարավորության դեպքում թերևս կընտրեր ավելի խաղաղ՝ թոքաբանի առօրյան, նա շարունակում է իր նվիրյալ ծառայությունը։

​Երիտասարդներին, ովքեր դեռ նոր են որոշում իրենց կյանքի ուղին, բժիշկն ունի մի պարզ, բայց հիմնարար պատգամ.

«Էական չէ, թե ինչ մասնագիտություն կընտրեք, պարզապես լավ սովորեք։ Եթե լինեք լավագույնը ձեր գործում, դուք միշտ պահանջված կլինեք»։

​Սամվել Աղալարյանի պատմությունը ոչ միայն բժշկագիտության, այլև մեծ պատասխանատվության, հայրենի եզերքին ծառայելու և սեփական խղճի առջև անդավաճան մնալու մասին է։ Նա մարդ է, ով գիտի կյանքի իրական գինը և ամեն օր անում է հնարավորն ու անհնարինը՝ այդ կյանքերը փրկելու համար։

Աղբյուրը՝ Javakheti Georgia։