Սերգեյ Բագրատյանի ավազի ապօրինի հանքը, վերջապես, փակվեց․ «Հետք»

«Հետք»-ը գրում է․

Իրավապահներից մեկ տարի պահանջվեց իշխող «Քաղաքացիական պայմանագիր» խմբակցության պատգամավոր Սերգեյ Բագրատյանի կնոջը պատկանող ավազի հանքը փակելու համար։ Ավազի ապօրինի արդյունահանումը «Հետքը» բացահայտել էր 2023 թ․-ի նոյեմբերին։

2024 թ․-ի հոկտեմբերի 25-ի դրությամբ Արարատի մարզի Ռանչպար գյուղում գտնվող հանքում որևէ աշխատանք չէր կատարվում։ Հանքի տարածքում միայն պահակներն էին։ Բեռնատար մեքենաները տեղում չէին, իսկ ծանր տեխնիկաների շարժիչների ձայնը չէր լսվում։ Հանք տանող ճանապարհին նկատեցինք ավազի լվացման համար ներմուծված նոր տեխնիկան, որը չէին հասցրել օգտագործել։

Մասնագիտությամբ երկրաբան Սերգեյ Բագրատյանը «Բարգավաճ Հայաստան» կուսակցությունից հեռանալուց և «Քաղաքացիական պայմանագիր» կուսակցության ցուցակով պատգամավոր դառնալուց հետո երկրաբանի իր գիտելիքները փորձեց կիրառել ավազի արդյունահանման ոլորտում։ Նրա կինը՝ Նաիրա Հակոբյանը, հիմնադրեց «Արարակ» ՍՊԸ-ն, որը Արարատի մարզի Ռանչպար գյուղում 64 հա հողամաս վարձակալեց։ Այդ հողամասում այգի հիմնելու պատրվակով վարձակալը սկսեց հողային աշխատանքներ կատարել։ Ըստ Սերգեյ Բագրատյանի՝ այդ ժամանակ տեսել են, որ տարածքում անպետք ավազի շերտ կա, փորձել են դա հեռացնել, որպեսզի կարողանան ծառեր տնկել։ Ու այդպես սկսել են հողամասի տարածքից օրական 100-ից ավելի բեռնատարներով ավազ արդյունահանել։ Մինչդեռ Հայաստանի օրենսդրությունը ընդերքն օգտագործելու հստակ կարգ է սահմանել։ Հանք շահագործել ցանկացողը նախ պետք է ունենա ընդերքն օգտագործելու իրավունք, իսկ հանք շահագործելուց առաջ պետք է ստանա շրջակա միջավայրի վրա ազդեցության փորձաքննության դրական եզրակացություն։   

Սերգեյ Բագրատյանը, հավանաբար, տեղյակ լինելով, որ օրենքով սահմանված կարգով հանքի շահագործումը հնարավոր կդառնա միայն տարիներ անց, այլ ճանապարհ է ընտրել։ Պատգամավորի կնոջը պատկանող ՍՊԸ-ն, առանց օրինական փաստաթղթերի, սկսել է ավազի ապօրինի արդյունահանումը։ Իրավապահները նրան մոտ մեկ տարի չեն անհանգստացրել։ Ավազի ապօրինի արդյունահանման մասին «Հետք»-ի հրապարակումից հետո պատգամավորի կինը բաժնեմասը փոխանցել է Սերգեյ Բագրատյանի հետ կապված մեկ այլ անձի՝ Վրեժ Եղոյանին։ Վերջինս Բագրատյանի բիզնես գործընկերն է։

Ըստ պաշտոնական տեղեկատվության՝ ապօրինի հանք շահագործելու վերաբերյալ Քննչական կոմիտեում ընթանում է քրեական վարույթի նախաքննությունը։ «Նախաքննության ընթացքում ՍՊԸ-ի տնօրինությունը պարտավորվել է Ռանչպար գյուղի նշված հասցեում գործունեություն չծավալել։ Ընկերությանը ներկայացվել են ճշտված հաշվարկներ՝ պատճառված գույքային վնասների և պարտավորությունների վերաբերյալ, արդյունքում՝ ընկերությունն ամբողջությամբ հատուցել է հանցագործությամբ պատճառված նախնական հաշվարկով արձանագրված գույքային վնասը՝ 54.743.318 ՀՀ դրամը, և հաշվարկված տույժերը և տուգանքները՝ ընդհանուր շուրջ 74.000.000 ՀՀ դրամի չափով»,- այս տարվա հուլիսին հայտարարել էր Քննչական կոմիտեն։

Դեռևս պաշտոնապես չհաստատված տեղեկություններով, պատգամավորին առնչվող երկու քրեական վարույթ էլ նախաձեռնվել է Հակակոռուպցիոն կոմիտեում։ Մեկը վերաբերում է պատգամավորի և կնոջ կողմից հանք շահագործած ՍՊԸ-ի բաժնետոմսերի տվյալը չհայտարարագրելուն։ Մյուս գործը վերաբերում է ապօրինի ձեռնարկատիրությամբ զբաղվելուն, որի պարագայում, սակայն, պետությանը պատճառված վնասը հատուցելու դեպքում անձը կարող է ազատվել քրեական պատասխանատվությունից (Քրեական օրենսգիրք, հոդված 281)։ Հակակոռուպցիոն կոմիտեից ո՛չ հերքեցին, ո՛չ էլ հաստատեցին քրեական վարույթների վերաբերյալ մեր տեղեկությունը։

Պատգամավոր Սերգեյ Բագրատյանը շարունակում է պաշտոնավարել, իսկ այս օրերին ակտիվ մասնակցում է պետական բյուջեի նախագծի քննարկմանը՝ հարցեր ուղղելով Կառավարության անդամներին։ Հայտնի չէ, թե նա երբ կպատասխանի քննիչների հարցերին, կամ, ընդհանրապես, կպատասխանի՞ իրավապահների հարցերին։