Եթե պատերազմն անխուսափելի է, իսկ զիջումներն երաշխիք չեն, ապա առնվազն չի կարելի անվտանգության ռազմավարական դիրքերն անդառնալի վատթարացնել․ Դանիելյան

Տասնյակ տարիներ օտարերկրյա ֆինանսավորմամբ գոյատևող, լրատվության հզոր միջոցների տիրապետող և ուղղորդված անձինք, ինչպես նաև ներդաշնակ գործող ադրբեջանցի քարոզիչները հանկարծ որոշել են Գերաշնորհ Բագրատ Սրբազանի նկատմամբ հնչեցնել օտարերկրյա գործակալ լինելու և պատերազմ հրահրելու անհեթեթ մեղադրանքներ: Այս մասին ֆեյսբուքյան իր էջում գրել է սահմանադրագետ Գևորգ Դանիելյանը։

«Եվ այս գերակտիվությունը թելադրված է բացառապես Տավուշի գյուղերը հանձնելու առնչությամբ Սրբազանի սկզբունքային դիրքորոշմամբ և հստակ իրավաչափ առաքելությամբ:

Պատերազմ հրահրում է, բացահայտ սպառնում է, ավելին՝ արդեն պատերազմով տարածքներ է զավթել և ողջ Արցախը հայաթափել հենց Ադրբեջանը, իսկ այդ երկրի ղեկավարի նկրտումներին իրավաչափություն են հաղորդում բոլոր նրանք, ովքեր, անտեսելով ակնհայտ իրավական հիմքերը, մտացածին փաստարկներով ամենօրյա ռեժիմով հաստատում են այդ գյուղերի իբր Ադրբեջանի կազմում լինելը: Եթե պատերազմն անխուսափելի է, իսկ զիջումները երաշխիք չեն, ապա առնվազն չի կարելի անվտանգության ռազմավարական դիրքերը անդառնալի վատթարացնել, համատեղ բնակությունը անտանելի դարձնել և անհասկանալի հույսեր փայփայել մշուշոտ ապագայից ....»։