կարևոր
2776 դիտում, 4 ամիս առաջ - 2024-03-18 12:22
Հասարակություն

Պատմական նշանակության փոքր հուշարձաններ մնացել են կրպակների, շինությունների թիկունքում․ հետևել է պետք․ Լ․ Գալստյան

ԱԺ Գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովում քննարկվեց «Հայաստան» խմբակցության պատգամավոր Լիլիթ Գալստյանի կողմից մշակված, «Պատմության և մշակույթի անշարժ հուշարձանների ու պատմական միջավայրի պահպանության եւ օգտագործման մասին» Հայաստանի Հանրապետության օրենքում փոփոխություններ և լրացումներ կատարելու մասին նախագիծը։

Ըստ հիմնավորման՝ նախագծի ընդունումը պայմանավորված է գործող օրենքում առկա որոշ բացթողումներ լրացնելու, ինչպես նաև մշակութային արժեքների պաշտպանության ոլորտում Հայաստանի ստանձնած միջազգային պարտավորություններին համահունչ օրենսդրական ամրագրում ունենալու անհրաժեշտությամբ: Նշվում է, որ նախագիծը միտված է՝ մշակութային արժեքների պահպանության գործընթացի շարունակականությանը, պատմամշակութային անշարժ ժառանգության օրենսդրության կատարելագործմանը, մշակութային արժեքների պահպանությանն ուղղված հնարավոր ռիսկերը նվազեցնելուն և կանխարգելելուն:

ԿԳՄՍ փոխնախարար Ալֆրեդ Քոչարյանը նշեց, որ  Կառավարությունը, մեծամասամբ, դրական է գնահատել, սակայն որոշ մասեր վերանայելու անհրաժեշտություն ունի։ Հանձնաժողովի փոխնախագահ Թագուհի Ղազարյանն էլ առաջարկեց կողմ քվեարկել նախագծին և աշխատել նախագծի վրա:

Լիլիթ Գալստյանի մշակած նախագիծը ստացավ դրական եզրակացություն:
Մանրամասն՝ տեսանյութում։