Իսրայելի բանակը հայտարարել է ավելի քան 400 պաղեստինցի զինյալների ոչնչացման մասին

Իսրայելի պաշտպանության բանակի (ՑԱԽԱԼ) գլխավոր խոսնակ, դերծովակալ Դանիել Հագարին հայտարարել է, որ զինվորականներն ավելի քան 400 պաղեստինցի զինյալ են սպանել Իսրայելի հարավում և Գազայի հատվածում և ևս տասնյակների  գերեվարել երեկ սկսված մարտական գործողությունների ժամանակ, հաղորդում է Times of Israel-ը:

«Այս ժամի դրությամբ մարտեր են ընթանում   Քֆար Ազա կիբուցում, մեծ թվով քաղաքներում խուզարկություններ են իրականացվում։ ՑԱԽԱԼ-ի ուժեր կան բոլոր քաղաքներում»,- ասել է Հագարին մամուլի ասուլիսում։

Ըստ նրա, Իսրայելի պաշտպանության բանակի խնդիրն է տարհանել բոլոր բնակիչներին Գազայի հետ սահմանին գտնվող քաղաքներից, դադարեցնել ռազմական գործողությունները Իսրայելի տարածքում, վերահսկել անվտանգության պատնեշի ճեղքումները և շարունակել հարվածներ հասցնել  Գազայի հատվածում գտնվող ահաբեկիչների թիրախներին։

Իսրայելի վարչապետ Բենիամին Նաթանյահուն իրավիճակը գնահատում է պաշտպանության նախարար Յոավ Գալանի, շտաբի պետ Հերցլ Հալեվիի և պաշտպանության նախարարության այլ բարձրաստիճան պաշտոնյաների հետ, հայտնում է Haaretz-ը։