Ուրուգվայի ԱԳ նախարարը դատապարտել է Չավուշօղլուի ազգայնական ժեստը հայերի նկատմամբ

Ուրուգվայի արտաքին գործերի նախարար Ֆրանսիսկո Բուստիլյոն դատապարտել է Մոնտեվիդեոյում հայերին ցուցադրած՝ Թուրքիայի արտգործնախարար Մևլութ Չավուշօղլուի ազգայնական ժեստը. հայտնում է El Pais-ը:

Ֆրանցիսկո Բուստիլյոն Հայոց ցեղասպանության տարելիցին նվիրված միջոցառման ժամանակ ասել է, որ Ուրուգվայը հիշատակը հարգող երկիր է, խաղաղության և ապագային ձգտող երկիր։

«Մեր երկիրը նախընտրում է հաշտությունը առճակատման դեպքում։ Մենք քարոզում ենք փոխըմբռնում, հանդուրժողականություն և հույս ունենք, որ նրանք, ովքեր այցելում են խաղաղության և հանդուրժողականության այս երկիր, նույնը կանեն։ Ես մերժում և դատապարտում եմ ցանկացած վիրավորական պահվածք կամ ժեստ, որը ենթադրում է ֆիզիկական կամ հոգեկան բռնություն»,- ասել է Բուստիլյոն՝ նկատի ունենալով Չավուշօղլուի ազգայնական ժեստը։

Հիշեցնենք, որ հայ ցուցարարների վանկարկումներին ի պատասխան, Չավուշօղլուն «գորշ գայլեր» ազգայնամոլների հայտնի ժեստն էր ցույց տվել, դրանից հետո Ուրուգվայի ԱԳՆ էր կանչվել Թուրքիայի դեսպանը: