Հայաստանի պաշտպանության նախարարն ընդունել է ՀԱՊԿ գլխավոր քարտուղարին

ՀՀ պաշտպանության նախարար Սուրեն Պապիկյանն ընդունել է աշխատանքային այցով Հայաստանի Հանրապետությունում գտնվող Հավաքական անվտանգության պայմանագրի կազմակերպության գլխավոր քարտուղար Ստանիսլավ Զասին։

ՊՆ մամուլի ծառայությունից հայտնում են, որ հանդիպման ընթացքում ՀԱՊԿ գլխավոր քարտուղարը շնորհավորել է Սուրեն Պապիկյանին՝ պաշտպանության նախարարի պաշտոնը ստանձնելու կապակցությամբ։

Զրուցակիցները քննարկել են ՀԱՊԿ-ում ՀՀ նախագահության ընթացքում կազմակերպության գործունեության գերակա ուղղությունները։ Սուրեն Պապիկյանն ընդգծել է, որ հայկական կողմի առաջնահերթությունների թվում են լինելու ՀԱՊԿ գործունեության արդյունավետության բարձրացումն ու կատարելագործումը, ինչպես նաեւ ՀԱՊԿ-ի ռազմական բաղադրիչի հետագա զարգացման խնդիրները:

Կողմերն ընդգծել են 2022 թվականի կարեւորությունը Հավաքական անվտանգության մասին պայմանագրի հոբելյանական 30-ամյակի եւ Հավաքական անվտանգության մասին պայմանագրի կազմակերպության 20-ամյակի առումով։ Նրանք հաստատել են, որ գալիք տարում պլանավորված միջոցառումներն իրականացվելու են առավել արդյունավետ՝ ի նպաստ ՀԱՊԿ անդամ երկրների փոխգործակցության բարձրացման եւ կազմակերպության միջազգային դերակատարության ընդլայնման: