Ալիևը հայտարարել է, որ Ադրբեջանը պատրաստ է բանակցություններ սկսել Հայաստանի հետ համաձայնագրի շուրջ՝ տարածքային ամբողջականության ճանաչման հիման վրա

Հակամարտությունն ավարտված է, ուստի Ադրբեջանն արդեն հայտարարել է Հայաստանի հետ խաղաղության համաձայնագրի շուրջ բանակցություններ սկսելու պատրաստակամության մասին` սահմանների սահմանազատման և սահմանագծման, միմյանց ինքնիշխանության և տարածքային ամբողջականության փոխադարձ ճանաչման հիման վրա: Նման համաձայնագիրը կարող է մեր տարածաշրջանը վերածել խաղաղության և համագործակցության տարածաշրջանի: Այնուամենայնիվ, մենք դեռ չենք տեսնում Հայաստանի կողմից դրական արձագանք մեր առաջարկին. ասել է Ադրբեջանի նախագահ Իլհամ Ալիևը՝ ելույթ ունենալով ՄԱԿ-ի Գլխավոր ասամբլեայի 76-րդ նստաշրջանում։

«Տրանսպորտային նախագծերը կարող են դառնալ խաղաղությանը և համագործակցությանը ծառայող ոլորտներից մեկը: Այս համատեքստում Զանգեզուրի միջանցքը, որը Ադրբեջանի հիմնական մասը կկապի Նախիջևանի Ինքնավար Հանրապետության և Թուրքիայի հետ, նոր հնարավորություններ կստեղծի մեր տարածաշրջանի համար:

Ադրբեջանը նոր իրողություններ է ստեղծել Հարավային Կովկասի տարածաշրջանում, և բոլորը պետք է դա հաշվի առնեն: Հայաստանը պետք է ընտրություն կատարի տարածաշրջանային համագործակցության և հարևանների նկատմամբ անօրինական, անհիմն տարածքային պահանջների միջև: Միջազգային հանրությունը պետք է դրական դեր խաղա այս իմաստով և հորդորի Հայաստանին՝ գիտակցել, որ խաղաղությանն այլընտրանք չկա: Պետք է վերջ տալ Հայաստանում ռևանշիզմին ուղղակիորեն կամ անուղղակիորեն աջակցելուն և նրա սպառազինությանը:

Հուսով ենք, որ երկար սպասված խաղաղությունը, անվտանգությունն ու կայունությունը վերջապես կհաստատվեն Հարավային Կովկասում: Ադրբեջանը կշարունակի իր հետևողական ջանքերը՝ նպաստելով տարածաշրջանային խաղաղությանը և զարգացմանը՝ ծառայելով տարածաշրջանի ամրապնդմանը»,- ասել է Ալիևը: