Բաքուն պատրաստ է բանակցություններ սկսել Երևանի հետ խաղաղության պայմանագրի շուրջ. Իլհամ Ալիև

Ադրբեջանը խաղաղության կողմնակից է, մենք պատրաստ ենք Հայաստանի հետ բանակցություններ սկսել խաղաղության համաձայնագրի շուրջ՝ հիմնված միջազգային իրավունքի հիմնարար սկզբունքների վրա, ինչպիսիք են տարածքային ամբողջականությունը, ինքնիշխանությունը և միջազգայնորեն ճանաչված սահմանների անձեռնմխելիությունը։ Ընդգծելով այս հարցում Հայաստանի կառուցողական դիրքորոշման կարևորությունը՝ հույս ունենք, որ Ֆրանսիան կաջակցի տարածաշրջանում խաղաղության օրակարգին․ Ադրբեջանի և Ֆրանսիայի միջեւ դիվանագիտական հարաբերությունների հաստատման 30-ամյակի կապակցությամբ Ֆրանսիայի նախագահ Էմանուել Մակրոնին ուղղված շնորհավորական ուղերձում երկուշաբթի նշել է Ադրբեջանի նախագահ Իլհամ Ալիեւը։

Փաստաթղթի տեքստը տեղադրված է թշնամական պետության ղեկավարի կայքում։

Իլհամ Ալիևը բարձր է գնահատել Արցախից զավթված տարածքների ականազերծման գործում Ֆրանսիայի աջակցությունը։ «Մենք բարձր ենք գնահատում Ֆրանսիայի աջակցությունը ականազերծման գործընթացին։ Միաժամանակ, ողջունում ենք ձեր երկրի ուշադրությունը հայ-ադրբեջանական հակամարտության ընթացքում անհետ կորած մոտ 4000 մեր հայրենակիցների ճակատագրի ճշտման հարցում»,- գրել է Ադրբեջանի նախագահը։

Ալիևի կարծիքով՝ քառակողմ ձևաչափով հանդիպումը և, որպես ԵՄ ներկայիս նախագահ, Ֆրանսիայի նախաձեռնած բանակցությունները հնարավորություն են տվել ամրապնդելու վստահությունը տարածաշրջանում և ապահովելու կայուն խաղաղություն ու կայունություն։