Ստամբուլի ջրանցքի հիմքը կդրվի հունիսի վերջին. Էրդողան

Թուրքիայի նախագահ Ռեջեփ Թայիփ Էրդողանը շաբաթ օրը հայտարարել է, որ Սև ծովը Մարմարա ծովի հետ կապող Ստամբուլի ջրանցքի հիմքը կդրվի հունիսի վերջին․ հայտնում է Anadolu գործակալությունը:

Էրդողանն ասել է, որ, իր կարծիքով, ջրանցքը կնպաստի քաղաքի աշխարհագրական, ռազմավարական և գեղագիտական զարգացմանը։ 

2011-ին Էրդողանի հայտարարած` 25 միլիարդ դոլար արժողությամբ 45 կիլոմետրանոց ջրուղին, ըստ ԶԼՄ-ների, բախվել է խիստ հակազդեցության: Մասնագիտական կազմակերպությունները, հասարակական կազմակերպությունները և Ստամբուլի ընդդիմադիր քաղաքապետը պնդում են, որ ջրանցքը լուրջ վտանգ է ներկայացնում՝ Ստամբուլում հնարավոր մասշտաբային երկրաշարժի առումով, նաև՝ վնաս կհասցվի մայրաքաղաքի վերջին անտառային տարածքներին, Մարմարա ծովի ֆլորային ու ֆաունային:

«Կան մարդիկ, որոնք անհանգստանում են, նրանք կան և թող լինեն: Երբ մենք շահագործման հանձնենք Ստամբուլի ջրանցքը, դա կբարձրացնի Ստամբուլի աշխարհագրական և ռազմավարական արժեքը, ինչպես նաև բնական գեղեցկությունը»,- ասել է Էրդողանը:

Թուրքիայի նախագահը նշել է, որ ջրանցքի վրա կառուցվելու է վեց կամուրջ, իսկ աջ ու ձախ կողմում կկառուցվի երկու քաղաք, որոնք մայրաքաղաքը դեպի լավը կփոխեն:

«Մենք դա կանենք: Մենք պետք է շատ լավ հասկանանք Ստամբուլի արժեքը»,- շեշտել է Էրդողանը:

Թուրքիայի բնակիչների 45.4% -ը դեմ է այդ նախագծին, մինչդեռ 38.5% -ն աջակցում է ջրանցքի կառուցմանը։

Հավելենք, որ ուրբաթ Բոսֆորի նեղուցում նավ էր վթարվել՝ կաթվածահար անելով նեղուցի աշխատանքները. Թուրքիայում շատերը պնդում են, որ դա միտումնավոր է իրականացվել՝ ցույց տալու համար Ստամբուլի ջրանցքի անհրաժեշտությունը։