Թուրքիան չի հրաժարվի Ստամբուլի ջրանցքի կառուցումից. Էրդողան

Թուրքիան ոչ մի դեպքում չի հրաժարվի Ստամբուլյան ջրանցքի նախագծի իրագործումից, որը կդառնա Սև և Մարմարա ծովերը միացնող նոր նավարկելի զարկերակ: Այս մասին հայտարարել է Թուրքիայի նախագահ Ռեջեփ Թայիփ Էրդողանը:

Թուրք նախագահի խոսքով՝ Ստամբուլյան ջրանցքի շինարարությունը շուտով կսկսվի: «Ստամբուլի ջրանցքն ամենամեծ և ռազմավարական առումով ամենակարևոր ենթակառուցվածքային նախագիծն է Թուրքիայում: Այս նախագծի իրականացման նախապատրաստման գործընթացը մոտենում է ավարտին»,- ըստ Anadolu-ի՝ ասել է Էրդողանը:

Թուրքական պետության ղեկավարը նշել է, որ շրջակա միջավայրի վրա Ստամբուլի ջրանցքի ազդեցության գնահատման վերաբերյալ զեկույցն ավարտվել է՝ հաշվի առնելով 56 կառույցների և կազմակերպությունների դիրքորոշումը, շուրջ 200 գիտնականների, լրատվամիջոցների և հասարակության ներկայացուցիչների կարծիքները: «Թուրքիան սկսում է և ավարտում Ստամբուլյան ջրանցքի կառուցումը՝ որոշակի շրջանակներ ուզեն, թե չուզեն: Մեզ համար կարևոր է միայն թուրք ժողովրդի կարծիքը»,- շեշտել է Էրդողանը:

Թուրքիայի նախագահը նշել է, որ Ստամբուլի ջրանցքի երկարությունը կկազմի 45 կմ, խորությունը՝ 21 մ: Ըստ նրա՝ այս ջրանցքը նոր հնարավորություններ կստեղծի տարածաշրջանի համար: