Իսրայելը Սիրիայում իրանական ուժերի ուղղությամբ կրկին հրթիռներ է արձակել

Իսրայելական օդուժը կիրակի հարձակվել է Դամասկոսի Սայդա Զեյնաբ արվարձանի վրա, որը տեղակայված է միջազգային օդանավակայան տանող ճանապարհին: Սաուդական Al Hadath հեռուստաալիքը հայտնում է, որ Գոլանի բարձունքներից իսրայելական ինքնաթիռները մի քանի հրթիռ են արձակել այդ տարածքի ուղղությամբ:

Մարդու իրավունքների սիրիական դիտարանը նշում է, որ  իսրայելական հետախուզությունը այնտեղ հայտնաբերել է իրանական ԻՀՊԿ զորքերի, ինչպես նաև «Հըզբոլլահի» ներկայություն:

Ըստ SANA-ի՝ «Սիրիայի հակաօդային պաշտպանության ուժերը կրակ են բացել Դամասկոսի երկնքում գտնվող՝ թշնամու օդային թիրախների ուղղությամբ և խոցել հրթիռների մեծ մասը»:

Իսրայելը վերջին անգամ հարվածել է սիրիական բանակի և իրանամետ աշխարհազորայինների դիրքերին Դամասկոսի միջազգային օդանավակայանի մոտակայքում փետրվարի 15-ին՝ սպանելով երեք զինվորի և  իրանցի չորս ռազմական  խորհրդականի: Փետրվարի 3-ին Իսրայելի հրթիռային հարձակումը թիրախավորել էր 4-րդ էլիտար դիվիզիայի հենակետը մայրաքաղաքի Էլ Քիսվա արվարձանում, ինչպես նաև ռազմական օբյեկտները Սախնայա արվարձանում և Էլ Հիմեում գտնվող հետազոտական կենտրոնը: