Խաղաղապահների մուտքը ԼՂ ծայրահեղ միջոց էր. Լեոնիդ Կալաշնիկով

Ռուս խաղաղապահների մուտքը Լեռնային Ղարաբաղի հակամարտության գոտի ծայրահեղ միջոց դարձավ այն պատճառով, որ կողմերը չէին կարողանում պայմանավորվել մարտերը դադարեցնելու շուրջ: Այս մասին ՏԱՍՍ-ին հայտնել է ՌԴ Պետդումայի ԱՊՀ գործերի, եվրասիական ինտեգրման և հայրենակիցների հետ կապերի հանձնաժողովի նախագահ Լեոնիդ Կալաշնիկովը:

«Կարծում եմ՝ ոչ ոք չի ուզում ռիսկի ենթարկել իր ժողովրդին, իր քաղաքացիներին: Այս պարագայում մենք դրան գնացինք՝ բացահայտ անհրաժեշտությունից ելնելով, քանի որ Հայաստանն ու Ադրբեջանը չէին կարողանում պայմանավորվել»,- ասել է պատգամավորը:

Կալաշնիկովն ընդգծել է, որ խաղաղապահ զորակազմը տեղակայվում է ինչպես Երևանի, այնպես էլ Բաքվի համաձայնությամբ:

«Քանի որ հակառակ դեպքում մենք երկու կողմից էլ որոշակի սադրանքներ կտեսնեինք: Հիմա որոշվելու է այդ գիծը, քիչ, թե շատ ինչ-որ հարաբերություններ կկառուցվեն զինադադարի վրա՝ այն հիմքով, թե  ինչպես դա վերահսկել: Բայց դա ավելի լավ է, քան մարդկանց մահը»,- շեշտել է խորհրդարանականը: