Հայաստանը դեռ մտադիր չէ դիմել ՀԱՊԿ-ին. վարչապետ

Հայաստանը մտադիր չէ դիմել Հավաքական անվտանգության պայմանագրի կազմակերպությանը (ՀԱՊԿ)` Ղարաբաղյան հակամարտության գոտում տիրող իրավիճակի հետ կապված. գրում է «Ինտերֆաքս»-ը՝ ՀՀ վարչապետ Նիկոլ Փաշինյանի՝ Երեւանում ռուս լրագրողներին տված հարցազրույցի ժամանակ հայտարարությանը հղումով:

Նա, մասնավորապես, նշել է. «ՀԱՊԿ-ին դիմելը քաղաքական հարց է: Շատ դժվար է խոսել սահմանների մասին, երբ դիմելու ժամանակն է: Մենք սերտ համագործակցում ենք ՀԱՊԿ-ի հետ, բայց կոնկրետ ընթացակարգերի գործարկումն այլ հարց է: Հայաստանի զինված ուժերը ունակ են պաշտպանել երկրի անվտանգությունը»:

Ըստ Փաշինյանի՝  Հայաստանը բոլոր մեթոդներով կապահովի իր անվտանգությունը: «Այլ հարց է` ՀԱՊԿ-ի հե՞տ, թե՞ առանց ՀԱՊԿ-ի: Մենք քննարկում ենք մեր անվտանգության ապահովման բոլոր հնարավորությունները` կախված իրավիճակից եւ ընդհանուր քաղաքական ենթատեքստից»,- բացատրել է նա ու շեշտել՝ ՀՀ-ն պատրաստ է հոկտեմբերի սկզբին ԵԱՏՄ միջկառավարական խորհրդի նիստ անցկացնել Երեւանում:

«Մենք պատրաստ ենք ընդունել հանդիպումը: Ոչինչ չի փոխվել»,- ասել է նա:

Հիշեցնենք՝ ավելի վաղ հոկտեմբերի 8-9-ը նախատեսվում էր ԵԱՏՄ միջկառավարական խորհրդի նիստ անցկացնել Երևանում: