«Կամքը» մինչ օգոստոսի 23-ը, ժամը 23-ը ժամանակ է տվել Արայիկ Հարությունյանին

Հայկական արժեքների պաշտպանության «ԿԱՄՔ» հասարակական նախաձեռնությունը մինչեւ օգոստոսի 23-ը, ժամը 23-ը ժամանակ է տվել Արայիկ Հարությունյանին։ Այդ մասին ասվում է «ԿԱՄՔ» տարածած հայտարարության մեջ, որում մասնավորապես ասվում է․ «Հայկական արժեքների պաշտպանության «ԿԱՄՔ» հասարակական նախաձեռնությունն անթույլատրելի է համարում ՀՀ ԿԳՄՍ նախարարության կողմից տարվող ապազգային գործողությունները:

Ուստի «ԿԱՄՔ»-ը առաջարկում է  նախարար Արայիկ Հարությունյանին` մինչև սույն թվականի օգոստոսի 23-ը, ժամը 23:00-ն, մեկնարկել Հայաստանի Հանրապետության կրթության հայեցակարգային հստակ բարեփոխումներ:

Այս առիթով` հորդորում ենք անհապաղ կազմակերպել հանրային լսումներ, հրապարակային  քննարկումներ հայեցի դաստիարակության, հայոց լեզվի և հայոց պատմության, ինչպես նաև Հայ Առաքելական եկեղեցու պատմության դասավանդման մասնագետների և բուհերի ուսանողների հետ:

Եթե նշված ժամկետում նախարարը չբավարարի մեր պահանջը, մենք պատրաստվում ենք նախաձեռնել նրա հրաժարականի պահանջի անժամկետ պայքար, որի հնարավոր բոլոր հետևանքների ողջ պաասխանատվությունը ընկնում է ՀՀ Կառավարության խղճի վրա»,- ասված է հայտարարության մեջ: