Հաֆթարը կոչ է արել հավաքական պաշտպանական պայմանագիր կնքել Լիբիայում թուրքական միջամտության դեմ

Լիբիայի ազգային բանակի հրամանատար, մարշալ Հալիֆա Հաֆթարը պահանջել է, որ արաբական պետությունների հավաքական պաշտպանական պայմանագրի դրույթները կիրառվեն Լիբիայում թուրքական ռազմական միջամտությանը հակազդելու համար: Այս մասին, ըստ «Ալ Արաբիա» հեռուստաալիքի, Կահիրեում հայտարարել է Հաֆթարը:

Հաֆթարը «Եգիպտոսից խնդրել է աջակցել նրան միջազգային ասպարեզում՝ դադարեցնելու Թուրքիայի ներխուժումը Լիբիա», և կրկին կոչ է արել «կիրառել Արաբական պետությունների լիգայի կոլեկտիվ պաշտպանական պայմանագրի դրույթները»: Նա նաև պահանջել է չեղարկել ԼԱԲ-ի սպառազինության մատակարարման էմբարգոն, ինչպես նաև իրականացնել միջազգային դիտարկումներ՝ Թուրքիայից Լիբիա զենքի մուտքը կանխելու համար:

Իր հերթին, Կահիրեն հայտարարել է, որ մերժում է Լիբիայի գործերում արտաքին միջամտությունը և հավաստիացրել է մարշալին, որ Եգիպտոսը «թույլ չի տա որևէ սպառնալիք իր արևմտյան սահմաններին»:

Չորեքշաբթի օրը Հաֆթարը Կահիրե էր ժամանել այցով, որը նախապես հայտարարված չէր Եգիպտոսի նախագահ Աբդել Ֆաթթահ ալ-Սիսիի և պաշտպանության գերատեսչության ղեկավարության հետ հանդիպելու համար: Եգիպտոսի մայրաքաղաքում անցկացվող խորհրդակցությունները նախորդում են Ժնևում անցկացվելիք համատեղ «5+ 5» ձևաչափով  ռազմական հանձնաժողովի նիստին՝ ԼԱԲ-ի և Ազգային համաձայնության կառավարության ներկայացուցիչների միջև: Նման հանձնաժողով ստեղծելու որոշումը հունվարին Բեռլինում կայացած համաժողովի արդյունքներից մեկն էր: Հաֆթարն արդեն հասկացրել է, որ Թուրքիայի ռազմական միջամտության պայմաններում բանակցությունները հնարավոր չեն: