ԱԳՆ մամլոյ խօսնակը՝ Ազգային առաջնորդարանում

«alikonline.ir» - Երէկ՝ դեկտեմբերի 29-ին Թեհրանի Ս. Սարգիս եկեղեցում կայացել է «Մահիկ եւ Խաչ դաշինք» ամանորեայ միջոցառումը:

Միջոցառմանը, որին ներկայ է եղել ԱԳ նախարարութեան պաշտօնական ներկայացուցիչ Սէյէդ Աբբաս Մուսաւին, մասնակցել են Թեհրանի քաղաքապետարանի բարձրաստիճան պաշտօնեաները, հայ նահատակների ընտանիքները, անձնուրացները, եւ Իրանի սկաուտական կազմակերպութեան անդամները:

Ս. Սարգիս մայր տաճարում ներկաներին ողջունել եւ բարի գալուստ է մաղթել թեմիս բարեխնամ առաջնորդ՝ Տ. Սեպուհ Ս. արք. Սարգսեանը:

Շնորհաւորելով Ամանորը եւ Ս. Ծննդեան տօները, Սրբազան Հայրը կարեւորել է միջկրօնական երկխօսութիւնը, համատեղ համակեցութիւնը եւ փոխադարձ սէրը:

Նա նշել է, որ բոլոր կրօնները կոչւած են մարդուն դէպի Աստւած առաջնորդելու՝ յաւելելով, որ բոլոր հաւատացեալները պէտք է միասնական լինեն, եւ միասիրտ ու միահոգի երկրպագեն իրենց երկնային Հօրը:

Ազգային առաջնորդարանի դահլիճում ԱԳՆ մամլոյ խօսնակը բարձր գնահատելով հայ նահատակներին եւ նրանց ընտանիքներին՝ իրանահայութեանը համարել է իրանական հայրենիքի անկախութեան եւ տարածքային ամբողջականութեան պահպանման առաջամարտիկներից: Նա նշել է, որ Իրանը գեղեցիկ է իր ազգային եւ կրօնական բազմազանութեամբ:

Նշենք, որ աւելի ուշ, Սէյէդ Աբբաս Մուսաւին Twitter-ի իր միկրոբլոգում անդրադարձել է ազգային առաջնորդարան իր այցին:

«Այսօր պատիւ ունէի մասնակցելու թեհրանահայութեան Ամանորի տօնակատարութեանը՝ Ս. Սարգիս եկեղեցում, Սրբազան Սեպուհ Սարգսեանի ներկայութեամբ:

Մեծ Իրանը գեղեցիկ է բոլոր ազգութիւնների եւ կրօնների համակեցութեամբ»,- գրել է նա: