ՏԵՍԱՆՅՈՒԹ․ Զգուշացրել էին, որ X, Y, Z քայլերը չանելու համար մի օր մեղադրանք կառաջադրվի․ Հրայր Թովմասյան

Զգուշացրել էին, որ X, Y, Z քայլերը չանելու համար մի օր մեղադրանք կառաջադրվի, այդ X, Y, Z քայլերը հրաժարական տալն էր՝ ըստ Yerkir.am-ի, ասաց ՍԴ նախագահ Հրայր Թովմասյանը՝ ՀՔԾ հարցաքննությունից անմիջապես հետո մոտենալով ՍԴ առջևի ցուցարարներին։

Հրայր Թովմասյանը նաև հստակեցրեց, որ իր նկատմամաբ որպես խափանման միջոց կիրառվելէ ստորագրություն չբացակայելու մասին։

«Քննիչն ասաց, որ իր կյանքում այսպիսի մեղադրյալ չի տեսել, որ այսպիսի տրամադրություն ունի, ասաց, որ երևի աշխարհում որևէ քննիչ չի տեսել։ Չի տեսել շատ պարզ պատճառով․ ինձ զգուշացրել էին, որ X, Y, Z քայլերը չանելու համար ձեզ մի օր մեղադրանք կառաջադրվի, ուստի մի օր կխոսեմ դրա մասին»,-ասաց նա։

Թովմասյանը պարզաբանեց, որ X, Y, Z քայլերը հրաժարական տալն էր․ «Ուստի, այս մեղադրանք առաջադրելն ինձ համար՝ 308-ի 2-րդ մասով, ոչ մի բան իմ կյանքում չի փոխել և չի էլ կարող փոխել։ Մենք բաժանվեցինք որպես պրոֆեսիոնալներ քննիչի հետ և ես իրեն ասացի, որ ես, որպես պրոֆեսիոնալ, իրեն գնահատում եմ, բայց ցավում եմ, որ ինքը ներգրավված է ոչ թե իրավական, այլ քաղաքական պրոցեսների մեջ, մենք բաժանվեցինք և ես հրաժարվել եմ որևէ ցուցմունք տալուց»,-ասաց նա։

Նա նաև ընդգշեց, որ վերջին 6-7 ամսին ՍԴ-ն աշխատել է աննախադեպ ճնշումների ներքո․ ճնշումները ոչ միայն հայհոյախառն էին, որ միայն սպառնալիքներ էին, ոչ միայն այսօրվա մասին զգուշացումներ էին, այլ կոնկրետ բռնության կոչեր էին և դրանց դրսևորումներ էին։ 

Այդ ժամանակահատվածում ՍԴ-ն աշխատել է առանց որևէ խոչընդոտի և ընդունել այնպիսի որոշումներ, որոնք ելակետային են լինելու մեր արդարադատական համակարգի համար։

Եթե խաղաղ ժամանակահատվածում դուք հերոսներ եք ման գալիս, ասաց Թովմասյանը, ապա այդ հերոսները հիմա ՍԴ շենքում նստած աշխատում են և որևէ մեկը չի համաձայնելու արդեն որակում ստացած՝ «օրինական կաշառքին»։

Նաև ընդգծեց բացառությունը․ «Վահե Գրիգորյանն այդ ցուցակի մեջ չի մտնում»։

Հրայր Թովմասյանը վստահ է, որ անկախ դատական իշխանությունը սկուտեղի վրա որևէ մեկը չի բերելու և չի մատուցելու։

«Այսօր պայքար է ոչ թե աթոռի համար, այլ պայքար է, թե վաղը ինչպիսի դատական համակարգ և պետություն ենք ունենալու, և այդ մարդկանց համար անաշխատ եկամուտ ստանալն անընդունելի է»,-ասաց նա։

Թովմասյանն ընդգծեց, որ այս ամբողջը քաղաքական պրոցես է, իսկ քաղաքական պրոցեսի դեպքում իրավունքի մասին խոսելն անիմաստ է։

ՍԴ նախագահի համոզմամբ՝ մեղադրանքի առաջադրումը և խափանման միջոցի կիրառումը իրավուինքի հետ որևէ աղերս չունեն։

Ավելի վաղ տեղեկեցարել էինք, որ ՍԴ-ում ՀՔԾ ներկայացուցիչները քննեցին ՍԴ նախագահ Հրայր Թովմասյանին, որից հետո մեղադրանք առաջադրվեց ՀՀ ՔՕ-ի 308-րդ հոդվածի 2-րդ մասով (Պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ): Խոսքն նույն քրեական գործի մասին է, որով մեղադրանք էր առաջադրվել Թովմասյանի սանիկին՝ Նորայր Փանոսյանին։ ՍԴ-ի բակում ընթանում է բողոքի ակցիա։

Հիշեցնենք, որ երեկ՝ դեկտեմբերի 26-ին, ՀՀ նախագահ Արմեն Սարգսյանը ստորագրել է «Սահմանադրական դատարանի մասին» սահմանադրական օրենքում լրացումներ կատարելու մասին, «Պաշտոնատար անձանց գործունեության ապահովման, սպասարկման եւ սոցիալական երաշխիքների մասին» օրենքում լրացում կատարելու մասին ՀՀ օրենքների փաթեթը՝ ՍԴ դատավորներին վաղ կենսաթոշակի ուղարկելու մասին։ Դրանից անմիջապես հետո ՀՔԾ քննիչները գնացել էին ՍԴ։ Ավելի ուշ տեղեկություն էր ստացվել, որ ՀՔԾ-ն եւս մեկ դրվագով լրացրել է ՍԴ նախագահ Հրայր Թովմասյանի սանիկ Նորայր Փանոսյանին առաջադրված մեղադրանքը և այդ հիմնավորմամբ դարձյալ դիմել դատարան՝ Փանոսյանին կրկին կալանավորելու համար։