Օգոստոսի 6-ը միջուկային զենքի դեմ պայքարի համաշխարհային օրն է

Օգոստոսի 6-ը նշվում է որպես Ճապոնիայի Հիրոսիմա քաղաքի օր, սակայն այն առավել հայտնի է որպես միջուկային զենքի դեմ պայքարի համաշխարհային օր: Այսօրը խորհրդանշում է 1945թ. օգոստոսին տեղի ունեցած իրադարձությունները՝ կապված Երկրորդ համաշխարհային պատերազմի հետ, հայտնում է Calend-ը:

ԱՄՆ-ում ատոմային ռումբի ստեղծումն ու դրա առաջին փորձարկումը նոր փուլ դարձավ մարդկության պատմության մեջ: Հենց այդ պահից սկսած ոչ ոք ապահովագրված չէ նոր զենքի կործանիչ ուժից  ու դրա հետեւանքներից:

1945 թվականի օգոստոսի 6-ին ԱՄՆ-ի ավիացիան ռմբակոծության ենթարկեց ճապոնական Հիրոսիմա քաղաքը, որը ոչ այնքան ռազմական բնույթ էր կրում, որքան նոր զենքի փորձարկում էր համարվում:

Հիրոսիմայի վրա նետված ատոմային ռումբի պատճառով վայրկյանների ընթացքում զոհվեց 80 հազար մարդ, անհետ կորավ՝ ավելի քան 12 հազարը, մոտ 40 հազարը վնասվածք ստացավ: Արդեն 3 օր անց ՝ օգոստոսի 9-ին, երկրորդ ռումբը գցվեց Նագասակի քաղաքի վրա: Ռումբը գցվեց առավոտյանը ժամը 11:00-ին և 73 հազար մարդկային կյանք խլեց:

Երկու ռմբակոծությունների արդյունքում տուժեց 300 հազար մարդ, ավելի քան 200 հազար մարդ ճառագայթման ենթարկվեց:

Հենց այդ ժամանակից Հիրոսիման դարձավ զանգվածային ոչնչացման զենքի դեմ պայքարի խորհրդանիշը:

Ամեն տարի օգոստոսի 6-ին աշխարհի մի շարք երկրներում բազմահազարանոց ցույցեր են անցկացվում միջուկային զենքի դեմ և աշխարհում խաղաղության հաստատման համար: