Թուրքիայում պաշտոնապես բացվեց երկրի ամենամեծ մզկիթը

Ռեջեփ Թայիփ Էրդողանի և մի շարք մուսուլմանական երկրների առաջնորդների ու ներկայացուցիչների մասնակցությամբ` այսօր Ստամբուլում բացվեց Թուրքիայի ամենամեծ` Չամլըջայի Մեծ մզկիթը: Մզկիթի շինարարությունը սկսվել էր 6 տարի առաջ: Այն միաժամանակ կարող է ընդունել 63 հազար հավատացյալի:

Սելջուկ-օսմանյան ճարտարապետական ոճով կառուցված մզկիթը երևում է Ստամբուլի ամեն վայրից: Այն ունի նաև թանգարան, պատկերասրահ, գրադարան, հանդիսությունների դահլիճ, արվեստանոց և մեծ կայանատեղի:

Մզկիթի 6 մինարեթներից 4-ն ունեն 107.1 մետր բարձրություն: Թիվը պատահական չէ` խորհրդանշում է 1071 թ. Մանազկերտի ճակատամարտում սելջուկների հաղթանակը: Մզկիթն ունի 72 մետր բարձրություն, որը խորհրդանշում է Ստամբուլում ապրող 72 ազգություններին. հաղորդում է «Անադոլու» գործակալությունը:

Ի դեպ, Չամլըջայի Մեծ մզկիթը գտնվում է Ստամբուլի ասիական մասում գտնվող Սկյուտար թաղամասի Չամլըջա բլրին: