Կապույտ մզկիթը` ՅՈՒՆԵՍԿՕ-ի մշակութային ժառանգության ցուցակի հավակնորդ

ՀՀ մշակույթի նախարարությունն առաջիկայում պատրաստվում է Երեւանում գտնվող իրանական Կապույտ մզկիթն ընդգրկել ՅՈՒՆԵՍԿՕ-ի մշակութային ժառանգության ցուցակում:

Yerkir.am-ի հետ զրույցում ՀՀ մշակույթի նախարար Հասմիկ Պողոսյանը նշեց, որ շատ կարեւոր է այս գործընթաց, քանի որ Իրանն այն եզակի երկրներից է, որտեղ հայկական եկեղեցիների, դպրոցների եւ կրթամշակութային օջախների նկատմամբ մեծ հոգածություն է ցուցաբերվում:

«Նրանք մեր հուշարձանները չափազանց լավ են պահպանում, անգամ Իրանի հյուսիսում գտնվող Սուրբ Թադեւոսի վանքը ՅՈՒՆԵՍԿՕ-ի մշակութային ժառանգության ցուցակում ընդգրկվել է «Իրանի հայկական եկեղեցական համալիրներ» ընդհանուր անվանակարգում: Սա նշանակում է, Իրանում գտնվող մեր բոլոր հուշարձանները, եկեղեցական համալիրները պարբերաբար կմտնեն ՅՈՒՆԵՍԿՕ-ի ցանկեր»,- նշեց նախարարը:

Պողոսյանը համարում է, որ հայկական կողմն էլ, ի պատասխան, պարտավոր է իրականացնել նույն քայլերը:

Կապույտ մզկիթը Երեւանի միակ մահմեդական աղոթատունն է, որը Կովկասում ամենամեծն է: Ի դեպ, որպես երկու ազգերի հանդուրժողական ու ակնածալի վերաբերմունքի ապացույց` մզկիթի ցուցասրահում հայկական եկեղեցին եւ պարսկական մզկիթը կողք կողքի են տեղադրված: