Հունաստանում գտնվող մզկիթը քարկոծվել է` ի նշան բողոքի

Երկուշաբթի առավոտյան անհայտ անձինք հարձակում են գործել Կենտրոնական Հունաստանում գտնվող թուրքական մզկիթի վրա. հայտնում է greekcitytimes.com կայքը։

Ոստիկանությունը հետաքննություն է սկսել Քուրսում մզկիթի քարկոծման կապակցությամբ, որը հայտնի է նաև որպես Օսման շահի մզկիթ անվամբ` Տրիքալա քաղաքում։ Նշվում է, որ անհայտ անձինք քարեր են նետել մզկիթի ուղղությամբ։

Քուրսումը համարվում է օսմանցի սուլթան Սելիմ I Ահեղի թոռան Օսման շահի դամբարանը և հենց նա էլ կառուցել էր վերոնշյալ մզկիթը։ Այն պահպանվում է UNESCO-ի կողմից։ Այն քաղաքում եղած 8 մզկիթներից միակն է, որ պահպանվել է։ Կառուցվել է հայկական արմատներով հայտնի ճարտարապետ (Միմար) Սինանի կողմից։

Թեև ոստիկանները դեռևս չեն պարզել հանգամանքերը, ակնհայտ է, որ այս քայլն արվել է ի նշան բողոքի` Սբ Սոֆիայի տաճարը մզկիթի վերածելու վերաբերյալ։