Նա, ով կարագացնի Արցախի նախագահական ընտրությունների գործընթացը, ցանկություն ունի տապալելու ամբողջ խնդիրը, պատմությունը. Լարիսա Ալավերդյան

Եթե որևէ մեկը թույլ տա իրեն արագացնել Արցախի նախագահական ընտրությունների գործընթացը, դա կլինի այն ուժը, որը փորձում  է տապալել Արցախի ամբողջ խնդիրը, պատմությունը: Այս մասին լրագրողների հետ զրույցում ասաց «Ընդդեմ իրավական կամայականությունների» հասարակական կազմակերպության գործադիր տնօրեն, ՀՀ մարդու իրավունքների նախկին պաշտպան Լարիսա Ալավերդյանը:

«Մենք միշտ որպես կարևոր գործոն ենք նշել, որ Արցախն առանց որևէ ցնցման, մշտապես լեգիտիմություն ունեցող իշխանություններ է ունեցել: Կարելի է քննադատել իշխանություններին, բայց երբ սկսում ես արագացնել այդ տեմպը՝ նմանակելով ՀՀ-ին, դա չճանաչված պետության համար ավելի մեծ հարված է, քան ճանաչված պետության: Երկրորդ՝ նրանք, ովքեր արդեն իսկ նախագահի թեկնածուի հայտ են ներկայացրել, բավականին տարբեր մարդիկ են, տարբեր լումա ունեն, տարբեր ոլորտներում են նրանց ունակությունները, ուստի պետք է սպասենք, թե ինչով են նրանք հանդես գալու: Ի վերջո, հայտ ներկայացնելը մի բան է, ծրագրով հանդես գալը՝  այլ: Բացի Արայիկ Հարությունյանից, մյուսների հետ շփվել եմ, ուստի պետք է ասեմ՝ եթե սադրիչ գործողություններ տեղի չունենան, Արցախում կունենանք հետաքրքիր ընտրություններ: Ամեն տեղ Արցախի ընտրություններն օրինակ եմ բերել, որ միայն Արցախում է, որ ընդդիմությունը լուրջ ձայներ է հավաքում, ոչ մի տեղ դա տեղի չի ունեցել՝ 20-ից ավելի տոկոս, միայն Ստեփանակերտում՝ 1/3-ից ավելի, այսինքն՝ այստեղ միշտ տեղի են ունեցել մրցակցային ընտրություններ: Հիմա ուզում են ամեն ինչ սևացնել, որ իրենք այդ սևի ֆոնին երևան: Դա ամենավատ գործողությունն է»,- նշեց Ալավերդյանը:

Yerkir.am-ի հարցին՝ Երևանի՞ց են փորձում Արցախի ներքին քաղաքական կյանքին միջամտել և արագացնել 2020-ին նախատեսված նախագահական ընտրությունները, նա պատասխանեց. «Ես կարծում եմ, որ նման ուժեր կարող են լինել Արցախում: Կրկնում եմ՝ չեմ ասում, որ հիմքեր չկան քննադատելու, բայց կա ազգային շահ և կուսակցական, և կուսակցությունը պետք է այնպիսի գործիքակազմ ունենա, որ չվնասի ազգային շահին:  Մինչև մենք չսովորենք դա համադրել և ընտրել, ամեն անգամ ունենալու ենք ցնցումներ: «Հեղափոխություն» ճչալով` առաջ չենք գնա, պետք է հստակեցնենք՝ իրական փոփոխությունները քրտնաջան աշխատանքից հետո են գալիս»:

Հիշեցնենք, որ մամուլում հրապարակումներ եղան, թե Արցախի նախագահ  Բակո Սահակյանը մինչև մայիս հրաժարական կներկայացնի: