Կառավարությունն ամեն ինչ անելու է, որ խոսենք ավելի բարձր աճի մասին. նախարար

Կառավարության այսօրվա արտահերթ նիստից հետո լրագրողները ՀՀ տնտեսական զարգացման և ներդրումների նախարար Տիգրան Խաչատրյանից հետաքրքրվեցին` ի՞նչ ասել է տնտեսական հեղափոխության ծրագիր: Ըստ նրա` տնտեսական հեղափոխություն պետք է իրականացնեն տնտեսական կյանքի մասնակիցները, իսկ կառավարությունն այդ մեծ խաղի կարևոր կազմակերպիչն ու մասնակիցն է: Գործադիրը, ըստ նախարարի, պարտավոր է անել այնպես, որ տնտեսվարող սուբյեկտների նախագծերը կյանքի կոչելու ճանապարհին որևէ խոչընդոտ չլինի:

 «Կառավարությունը հայտարարել էր, որ տնտեսական աճի շարժիչը լինելու է ապրանքի արտահանումը կամ Հայաստանում ստեղծված ապրանքներն արտերկրյա շուկաներում իրացնելու հնարավորությունը։ 38 տոկոսի արտահանում ունենք, և հայտարարվել է, որ դրանց կշիռը կհասնի 43 տոկոսի: Մյուս կարևոր ցուցանիշը ներդրումների աճն է, որի ցուցանիշը 2023-ին պետք է հասնի 23-25 տոկոսի»,- ասաց Խաչատրյանը` հավելելով. «Մեր ցանկությունն է, որ ապահովվեն այնպիսի պայմաններ, որ տնտեսական աճը էապես բարձր լինի: Բայց ամեն ինչ պետք է հիմք ունենա, իսկ հիմքը ներդրումներն են: Եթե կառավարությանը հաջողվի (իսկ կառավարությունն ամեն ինչ անելու է, որ դա տեղի ունենա), ապա վստահ եղեք, որ մենք խոսելու ենք ավելի բարձր աճի մասին»:

Անդրադառնալով դիտարկումներին, թե կառավարության ծրագիրը «բաժակաճառերի ծրագիր է», նախարարն անհամաձայնություն հայտնեց` ընդգծելով, թե նման որակումներ տվողները բավականաչափ ուշադիր չեն կարդացել այն:

Տիգրան Խաչատրյանը հայտնեց նաև, որ այսօր, ըստ երևույթին, վարչապետի հետ կառավարության ամբողջական կազմի մասին քննարկում կունենան, ու ավելի հստակ կլինի, թե ինչ տեսք կունենա գործադիրը: