Ամեն ինչ անելու ենք՝ ավելի լավ հանդես գալու համար. Արթուր Եղոյան

Սոչիում շարունակվում են ձմեռային Օլիմպիական 22-րդ խաղերը: Արդեն տեղեկացրել էինք, որ փետրվարի 9-ին  Հայաստանի չորս ներկայացուցիչներից պայքարի մեջ են մտել  դահուկորդներ Արթուր Եղոյանն ու Սերգեյ Միքայելյանը՝ սկիաթլոն ձևում:

Սերգեյ  Միքայելյանը 68 մարզիկների մեջ զբաղեցրեց 46-րդ տեղը, իսկ Եղոյանը` 63-րդ: 

Այնուհետև հայ մարզիկները՝ մարզիչների հետ միասին որոշեցին հրաժարվել սպրրինտից, որպեսզի խնայեն ուժերը:

Yerkir.am-ի հետ զրույցում հայ օլիմպիական Արթուր Եղոյանը նշեց, որ նման մրցումներում հանգիստը շատ կարևոր է և դա հնարավորություն է տալիս հնարավորինս լավ  նախապատրաստվել մյուս մրցատարածության համար:

«Սպրինտի համար պետք էր հատուկ վարժություններով նախապատրաստվել: Մենք այդքան էլ կարևորություն չենք տվել այդ մրցատարածությանը: Սպրինտին չմասնակցելով՝ հանգստանալու հնարավորություն ունեցանք, վերջինս  շատ կարևոր է նման մրցումներում:

Այն մարզիկներին, որոնց սկիաթլոնում հաղթեցի, նախկինում զիջել եմ:  Իմ կարծիքով՝ նորմալ հանդես եկանք: Ինչ վերաբերում է 15կմ մրցատարածությանը՝ փորձելու ենք անել ամեն ինչ՝ ավելի լավ և արդյունավետ հանդես գալու համար»,- ասաց Եղոյանը:

Փետրվարի 14-ին դահուկորդներ Աթուր Եղոյանն ու Սերգեյ Միքայելյանը իրենց ուժերը կչափեն 15կմ մրցատարածությունում: