Մենք չափազանց արժևորում ենք մեր ընդհանուր կապերն ու արմատները. Իրանի ԱԳՆ խոսնակ

Իրանի ԱԳՆ պաշտոնական ներկայացուցիչ Բահրամ Ղասեմին ողջունել է Հայաստանի խորհրդարանական ընտրությունների կայացումը՝ հույս հայտնելով, որ դրանց արդյունքում Իրանի եւ Հայաստանի հարաբերությունների ընդլայնման ու ամրապնդման ականատեսը կլինենք:

Իրանի ԱԳՆ հանրային դիվանագիտության եւ մամուլի վարչությունից տեղեկացնում  են, որ Բահրամ Ղասեմին Հայաստանում արտահերթ խորհրդարանական ընտրությունների կայացումը համարել է հարեւան երկրում ժողովրդավարական փոփոխությունների բաղադրիչ մաս ու կարեւոր իրադարձություն ներքաղաքական ասպարեզում տեղի ունեցող փոփոխությունների ֆոնին:

ԱԳՆ պաշտոնական ներկայացուցիչը կարեւոր է համարել Իրանի արտաքին քաղաքականության մեջ, ինչպես նաեւ տարածաշրջանային խաղաղության ու կայունության պահպանման գործում հարեւան երկրների հետ հարաբերությունների նշանակությունը՝ նշելով, որ աշխարհագրական միացվածությունը մշակութային եւ պատմական հարաբերություններ է ձեւավորել Իրանի եւ հարեւան երկրների միջեւ: «Մենք չափազանց արժեւորում ենք մեր ընդհանուր կապերն ու արմատները»,- ընդգծել է նա: