Վրաստանում ընտրողների մի մասին ահաբեկել են․ ԵԱՀԿ

ԵԱՀԿ դիտորդական առաքելության անդամները եզրակացրել են, որ Վրաստանում նախագահի ընտրությունների երկրորդ փուլը թեեւ մրցակցային է եղել, թեկնածուները հնարավորություն են ունեցել անցկացնել նախընտրական քարոզարշավներ, սակայն կողմերից մեկն անհիմն օգտվել է իր առավելություններից: Իսկ ավելի հստակ, ԵԱՀԿ առաքելությունը մեղադրում է իշխող «Վրացական երազանք» կուսակցությանը՝ վարչական ռեսուրսները չարաշահելու մեջ:

Դիտորդներն արձանագրել են ընտրողների բարձր ակտիվություն, բայց կասկածներ ունեն, որ մի մասին ահաբեկել են: Բացի դրանից, Հանրային հեռուստառադիոընկերությունը, նաեւ մասնավոր լրատվամիջոցների խմբագրական քաղաքականությունը, ըստ դիտորդների՝ անաչառ եւ անկախ չի եղել: