Պոմպեոն պետք է ստանձնի իր ասածների պատասխանատվությունը. Իրանի ԱԳՆ

Իրանի ԱԳ նախարար Մոհամմադ Ջավադ Զարիֆն արձագանքել է նախօրեին իր ամերիկացի գործընկեր Մայք Պոմպեոյի հայտարարությանը:

«Նա կա'մ պետք է ստանձնի իր ասածների պատասխանատվությունը, կա'մ պետք է սեփական անձը զերծ պահի ԱՄՆ գործողություններից: Երկուսի մեկտեղում լինելն անհնարին է: Նա լկտիաբար, մարդկության դեմ հանցագործությունների սպառնալիքով թիրախավորում է Իրանի շարքային քաղաքացիներին, իսկ հետո քննադատում է ԶԼՄ-ներին իր խոսքերը մեջբերելու համար»,- Twitter-ի իր միկրոբլոգում գրել է Իրանի արտաքին քաղաքական գերատեսչության ղեկավարը:

Ենթադրաբար, Զարիֆն ակնարկել է նախօրեին ԱՄՆ պետքարտուղար Մայք Պոմպեոյի՝ Newsweek պարբերականի մասին Tweet-ին, որում նա խիստ քննադատության էր ենթարկել ամերիկյան հայտնի պարբերականին, որը հատուկ ռեպորտաժով անդրադարձել էր Իրանի քաղաքացիների վրա ԱՄՆ նոր պատժամիջոցների բացասական ազդեցությանը: «Ամո՛թ կեղծարար Newsweek»ին, որն աջակցում է Զարիֆին՝ ստեր տարածելու համար: Մարդասիրական նշանակության ապրանքամիջոցների հետ կապված ֆինանսական հոսքերը բացառված են պատժամիջոցներից»,-Twitter-ի իր միկրոբլոգում գրել էր Պոմպեոն: