Տղամարդը պիտի կրակի, 75 գրանցված զենք ունեմ, կրակել սիրում եմ. Գագիկ Ծառուկյան

Ըստ  ԱԺ «Ծառուկյան» խմբակցության ղեկավար Գագիկ Ծառուկյանի` իր փեսաները գործարարներ չեն, բոլորն էլ սեփականատերեր են: «Ապագան երիտասարդներինն է, եթե ժողովուրդը իրենց կցանկանա ձայն տալ, կմտածեմ ցուցակում ընդգրկելու մասին»,- խորհրդարանում լրագրողների հետ զրույցում ասաց նա` անդրադառնալով հարցին` արդյո՞ք արտահերթ խորհրդարանական ընտրությունների` իրենց ցուցակում կլինեն իր երկու գործարար փեսաները՝ Արգամ Աբրահամյանը և Դավիթ Մանուկյանը:

Ծառուկյանը տեղեկացրեց, որ ցուցակը գլխավորելու է ինքը, և հիմա մտածում է, թե ինչպիսի ցուցակ է կազմելու, որ փոփոխություններ լինեն:

Ինչ վերաբերում է հարցին` արդյո՞ք ինքը բարեխոսել է Նիկոլ Փաշինյանի մոտ իր խնամու` Հովիկ Աբրահամյանի և Ջոնիկ Աբրահամյանի համար, որ վերջինս խափանման միջոցը փոխվել է` հիմա նա ազատության մեջ է, Ծառուկյանը պատասխանեց. «Ոչ մի ներդրում չեմ ունեցել: Օրինականության հարց է, օրենքի, օրինականության առաջ բոլորն են պատասխանատու: Ջոնիկ Արգամիչին ձերբակալել էին զենքի համար, կասկածում էին` Մարտի 1-ի զենքերն են, ճշտել են` Մարտի 1-ի հետ կապ չունի, բաց են թողել: Դրանք 15 տարի թաքցրած զենքերն են եղել»,- նշեց Ծառուկյանը՝ հավելելով, որ վաղը պատերազմ կարող է լինել, և առաջին գծում դրանց անհրաժեշտությունը կլիներ:

Անդրադառնալով հարցին, թե Հովիկ Աբրահամյանը ե՞րբ է զենքով առաջին գծում կանգնել, Ծառուկյանն ասաց, որ առաջին գծում եղել է, ուղարկել է, գնացել են: «Պաշտպանելը` մենակ զենք վերցնել կանգնելը չի, պաշտպանին հարկավոր է կերակրել, զինել, ամեն ինչ էլ»,- նշեց նա:

Իսկ թե ինքն ի՞նչ զենքեր ունի, Ծառուկյանն արձագանքեց. «Օրինական գրանցված 75 զենք ունեմ, նագրադնոյ զենք ունեմ: Զ զենք շատ սիրում եմ: Աղջի'կ ջան, ջութակ ես սիրում, ես էլ զենք եմ սիրում: Հատուկ գրանցած զենքեր են: Զենք սիրում եմ, կրակում եմ, որսի եմ գնում. տղամարդը պիտի կրակի: Ծառուկյանի զենքերը բոլորը օրինական գրանցված զենքեր են, ստուգված, ցանկացած պահի կարամ երկրի պաշտպանության համար օգտագործեմ»:

Հարցին` չի՞ ցանկանում նախաձեռնությամբ հանդես գալ և զենքը հանձնել պետությանը, Ծառուկյանը պատասխանեց, որ իրեն հունից չեն կարող հանել, եթե պետք լինի կհանձնի: