Շիրակի մարզպետը նույն կարծիքի՞ն է. Արթիկի ծննդատան նախկին տնօրենը դիմել է մրցույթին

Շիրակի մարզի Արթիկ քաղաքի Մոր և մանկան առողջության պահպանման կենտրոնի տնօրեն Սիմոն Մանուկյանը դեռ հուլիս ամսին տարօրինակ պատմության մեջ ընկավ: Նա կասկածվում էր յուրացում կատարելու մեջ, փաստի առթիվ քրեական գործ էր հարուցվել:

Խնդիրն այն է, որ տնօրենը, որպես սանիտար, աշխատանքի է հրամանագրել Արթիկ քաղաքի մի բնակչուհու, որը աշխատանքի չի հաճախել, սակայն ստացել է աշխատավարձ: Փաստաթղթերի ուսումնասիրությամբ պարզվել էր, որ այդ աշխատակցուհուն վճարվել է ավելի քան 2.3 մլն դրամ գումար:

Նշենք, որ, աշխատանքային պայմանագրի գործողության ժամկետը լրանալու հետ կապված, հուլիսի 24-ին Սիմոն Մանուկյանն ազատվել էր տնօրենի պաշտոնից,  սակայն շարունակում է աշխատել հիվանդանոցում` որպես բժիշկ:

Նոյեմբերի 9-ին հայտարարվել է մրցույթ տնօրենի թափուր պաշտոնի համար: Հոկտեմբերի 8-ը դիմումների ընդունման վերջնաժամկետն է:

Yerkir.am-ի հետ զրույցում հիվանդանոցի նախկին տնօրենը նշեց, որ ինքն էլ է դիմել մրցույթին: Իսկ թե ի՞նչ ընթացքի մեջ է քրեական գործը, Մանուկյանը պատասխանեց, որ տեղյակ չէ՝ այն կարճվե՞լ է, թե՞ ոչ, սակայն ինքը փոխհատուցել է որոշակի գումար:

«Իմ մեղավորությունը, այո, կար: Խնդիրն այն է, որ ես, որպես սանիտար, մեկին աշխատանքի էի ընդունել, նա էլ երեխա-մայր էր, երբ չէր հասցնում, սկեսուրն էր գալիս, մաքրություն անում: Իրար փոխարինելով` աշխատում էին, բայց մեզ մոտ ձևակերպված էր միայն հարսը՝ մեկ դրույքով: Ինձ հետաքրքրում էր աշխատանքը, որն էլ արվում էր, դե երեխա-մայր էր, չէր հասցնում հաճախ գալ, ու դրա համար սկեսուրն էր գալիս: Աշխատանքային օրենսգրքով, սակայն, գիտեմ, որ նման բան չի կարելի, դրա համար էլ փոխհատուցեցի: Յուրացում չէր եղել, բնականաբար»,- ասաց Մանուկյանը:

Գլխավոր դատախազության լրատվական ծառայությունից Yerkir.am-ին տեղեկացրեցին, որ Սիմոն Մանուկյանի դեմ հարուցված քրգործը կարճվել է:

Նշենք նաև, որ ԲԿ-ի աշխատակիցները դեռ հուլիսին հանդիպել էին Շիրակի մարզպետ Կարեն Սարուխանյանի հետ՝ խնդրելով, որպեսզի նա երկարացնի Սիմոն Մանուկյանի պայմանագիրը, սակայն մարզպետն ասել էր, թե անհնար է, քանի որ տնօրենը խախտումներով է աշխատել, չարաշահումներ են եղել, ինքը՝ որպես մարզպետ, չի ցանկանում, որպեսզի Սիմոնյանը շարունակի աշխատել` որպես տնօրեն: