Տնօրենի մրցույթ` թիվ 17 հատուկ դպրոցում. մրցույթին դիմել է նաև նախկին մի տնօրեն, որի դեմ քրգործ էր հարուցվել

«Երևանի հենաշարժական համակարգի խախտումներ ունեցող երեխաների թիվ 17 հատուկ դպրոց» ՊՈԱԿ -ի տնօրենի թափուր պաշտոնը զբաղեցնելու համար հոկտեմբերի 29-ին հայտարարված մրցույթը տեղի կունենա վաղը:

Yerkir.am-ի տեղեկություններով` մրցույթին մասնակցելու հայտ է ներկայացրել նաև Նելլի Պարոնյանը, որը նախկինում թիվ 37 դպրոցի տնօրենն էր: Նրա պաշտոնավարման տարիներն այնքան էլ հարթ չեն անցել:

Դեռ 2014-ին Պարոնյանը նախկին քաղաքապետ  Տարոն Մարգարյանի կողմից խիստ նկատողություն էր ստացել երեխաների և ծնողների հանդեպ կոպիտ վերաբերմունք ցուցաբերելու համար։ Տնօրենին նախազգուշացվել էր` նման վարքը կրկնելու դեպքում կազատվի աշխատանքից:

Այնուհետև անցյալ տարի Պարոնյանի դեմ քրեական գործ էր հարուցվել, ինչը մեզ հետ զրույցում հաստատեց ՀՀ ոստիկանությունը: Դրան հաջորդեցին ուշագրավ հանգամանքներ. նախ` 2017-ի հունիս ամսին կասեցվեցին Պարոնյանի`որպես  թիվ 37 դպրոցի տնօրենի գործառույթները, այնուհետև նա աշխատանքից ազատման դիմում գրեց սեպտեմբեր ամսին:

Թե ի՞նչ ընթացք է ստացել Պարոնյանի դեմ հարուցված քրեական գործը, Yerkir.am-ը կանդրադառնա առաջիկայում: