«Լավագույն մարզական ընտանիք» մրցույթին Արագածոտնի մարզը կներկայանա 12 ընտանիքով. մարզպետը հաջողություն է մաղթել նրանց

Հուլիսի 23-28-ը Ծաղկաձորում անցկացվում է ՀՀ Նախագահի մրցանակի համար «Լավագույն մարզական ընտանիք»  միջոցառման հանրապետական փուլը:  Արագածոտնի մարզից մրցույթին մասնակցում է մարզային փուլում լավագույն արդյունքներ գրանցած 12 ընտանիք՝ Ապարանից, Կարբիից. Արագածավանից, Աշտարակից եւ Թալինից: Մեկ ընտանիք մարզը կներկայացնի նաեւ հաշմանդամություն ունեցող ընտանիքների մրցապայքարում:

Ծաղկաձոր մեկնելուց առաջ մարզական ընտանիքներին ընդունեց մարզպետ Աշոտ Սիմոնյանը: Մարզպետը շնորհավորեց նրանց՝ մրցույթի մարզային փուլում հաղթելու եւ հանրապետական մրցույթին մասնակցելու համար: Նա հաջողություն մաղթեց ընտանիքներին՝ հորդորելով բարձր պահել Արագածոտնի  պատիվը, ակտիվ լինել,  մասնակից լինել  բոլոր միջոցառումներին եւ   միաժամանակ լավ հանգիստ ունենալ:

Մարզպետը կարեւորեց մրցույթի նշանակությունը՝ նշելով, որ առողջ ապրելակերպին զուգահեռ այն հետագայում մտերիմ հարաբերություններ ձեւավորելու, բարի հիշողություններ ունենալու լավագույն հնարավորություն է:

ՀՀ Արագածոտնի մարզպետարանի տեղեկատվության եւ հասարակայնության հետ կապերի բաժին