Ցանկության դեպքում սիրո և հանդուրժողականության հեղափոխությունը կարող է նաև ՀՀԿ-ինը լինել. Արամ Սարգսյան

Ամբողջ ընթացքը մի տեսակ տոնական չէ, ինչ-որ անհավես է. ԱԺ-ում վարչապետի ընտրությունից առաջ ելույթում հայտարարեց «Ելք» խմբակցության պատգամավոր Արամ Սարգսյանը: Նա նախ շնորհավորեց Շուշիի ազատագրման օրվա առթիվ և ասաց. «Այսօր մենք ընտրում ենք ոչ թե ԱԺ-ում ներկայացված խմբակցությունների 1/3-րդի թեկնածուին, այլ ՀՀ Սահմանադրության պահանջն ենք կատարում, որն է՝ ժողովրդի կամքն օրենք է, իսկ մեզ` բոլորիս, արդեն իսկ ակնհայտ է և պարզ, որ ժողովուրդն իր ամբողջականության և մեծամասնության մեջ` ՀՀ-ում և ՀՀ-ից դուրս, ուզում է իր իշխանության իրացումը տեսնել Նիկոլ Փաշինյանի գլխավորությամբ, ինչին, հուսով եմ, այսօր դրական պատասխան կտանք»։

Սարգսյանն ասաց, որ շատ լավ հասկանում է Հանրապետականին՝ ընդգծելով, որ ցանկության դեպքում սիրո և հանդուրժողականության հեղափոխությունը կարող է նաև նրանցը լինել։ «Անսխալական մարդ, առավել ևս` անսխալական քաղաքական ուժ գոյություն չունի»,- շեշտեց նա։