Ես այն մարդկանցից չեմ, որ ղեկավարվում են «պրիազնիյով կամ նեպրիազնիյով». Հերմինե Նաղդալյան

Հայտնի է, որ ԵԽԽՎ հայաստանյան պատվիրակության անդամ Հերմինե Նաղդալյանին կփոխարինի ՀՀԿ-ական այլ պատգամավոր` Կարինե Աճեմյանը: Նաղդալյանը խորհրդարանում լրագրողների հետ զրույցում նշեց, որ կարգն է այդպիսին:

Հարցին` վիրավորված չէ՞ Սերժ Սարգսյանից, քանի որ ասում են` նա է անձամբ ուզում, որ Նաղդալյանը հեռանա ԵԽԽՎ պատվիրակության կազմից, նա պատասխանեց. «Ով ասում է, նրանից հարցրեք»:

Պատգամավորն ասաց, որ թեև միջանցքում հարցազրույց տալու նախասիրություն չունի, այդուհանդերձ, կպատասխանի այդ հարցին: «Դեռ այս խորհրդարանի ստարտի ժամանակ, երբ խորհրդարանը ընտրվեց, պայմանավորվածությունը խորհրդարանի ղեկավարության և ՀՀ նախագահի հետ եղել է այն, որ, քանի որ նոր պատվիրակություն է, և այնտեղ կան նոր մարդիկ, անհրաժեշտ է, որ փորձառուները մի փոքր ավելի երկար աշխատեն: Սա նախատեսված է նաև Եվրոպայի խորհրդի Խորհրդարանական վեհաժողովի կանոնակարգով»,- ասաց նա:

Նաղդալյանը նշեց, որ, ըստ ԵԽԽՎ կանոնակարգի, նոր խորհրդարան ընտրելու դեպքում հին անդամները վեց ամիս շարունակում են իրենց աշխատանքը, և դա պայմանավորված է նրանով, որ փորձի, կապերի, հարաբերությունների փոխանցման անհրաժեշտություն կա, զեկույցներ կամ աշխատանքներ կան, որոնք կիսատ են, վերջիվերջո, կա ինստիտուցիոնալ հիշողության փոխանցման անհրաժեշտություն, և դրա համար կանոնակարգը դա կարգավորել է:

«Ինչ վերաբերում է կոնկրետ իմ դեպքին, ապա ես ձեր անհանգստությունն ուզում եմ փարատել. ի սկզբանե այս խորհրդարանի ձևավորման ժամանակ մեր պայմանավորվածությունը այսպիսին է եղել, որ վեց ամսվա չափ ես այս պատվիրակության մեջ կատարելու եմ իմ աշխատանքները, զուգահեռաբար, ես նշանակվել եմ ԵԱՀԿ պատվիրակության ղեկավար, իսկ վեց ամիս հետո թողնելու եմ ԵԽԽՎ-ն և շարունակելու եմ ԵԱՀԿ-ում իմ աշխատանքները»,- ասաց պատգամավորը:

Հարցին էլ` կա՞ Արփինե Հովհաննիսյան-Հերմինե Նաղդալյան հակամարտություն, նա պատասխանեց. «Ես հնարովի բաների մասին խոսելու որևէ նախասիրություն չունեմ, որևէ մեկի հետ ընդհանրապես հակասություն չունեմ: Ես այն մարդկանից չեմ, որ անձնական և այլ տիպի հարաբերությունները բերում են աշխատանքային դաշտ կամ ղեկավարվում են նախասիրություններով, կամ ինչպես ինչ-որ մեկը գրել էր` «պրիազնիյով կամ նյեպրիազնիյով»: Ես այստեղ գալիս եմ աշխատանքի և աշխատում եմ: Կարծում եմ` մեզնից յուրաքանչյուրին պետք է գնահատեն մեր կատարած աշխատանքով»: