Իրանում կատարվող իրադարձությունները կազդե՞ն իրանահայերի վրա

Իրանում միշտ էլ սոցիալական խնդիրներով պայմանավորված ցույցեր եղել են, սակայն, ի տարբերություն վերջին ցույցերի, մեծ տարածում չեն գտել. այսօր լրագրողներին ասաց իրանագետ Տիգրան Դավթյանը: Նրա խոսքով՝ բողոքի ալիքը տարածվեց սոցիալական ցանցերի միջոցով:

Իրանական «Ռադիո Ֆարդա»-ի հայաստանյան թղթակից Ռուբիկ Մինասյանի խոսքով էլ` թեև Իրանում արգելափակված է Facebook-ը, սակայն այնտեղ գործում է Telegraph նամակագրական կայքը, որտեղ շուրջ մեկ միլիոնանոց խմբում տարածվում էին ակցիաների վերաբերյալ տեսանյութերը, կոչերը: Ըստ նրա` դժվար է ասել, որ ցույցերը կոնկրետ մեկ պատճառ ունեին:

Մինասյանը նշեց, որ հիմնական պատճառը սոցիալական խնդիրներն էին՝ թանկացումները, չվճարված աշխատավարձերը, աշխատատեղերի բացակայությունը: Նրա խոսքով՝ վերջին շրջանում Իրանում գործազրկությունն ավելացել է` պայմանավորված նավթի իրացման հետ կապված խնդիրներով և Իրանի նկատմամբ կիրառվող միջազգային սանկցիաներով:

Մինասյանը հայտնեց, որ Իրանի բնակչությունը, հատկապես` երիտասարդները շատ քաղաքականացված են: Երկրի բնակչության 60 տոկոսը երիտասարդներ են, որոնք պարբերաբար փորձում են օրակարգում պահել հանրությանը հուզեղ հարցերը:

Տիգրան Դավթյանի խոսքով՝ Իրանում կատարվող իրադարձությունները վտանգավոր են տարածաշրջանում անկայունություն ստեղծելու տեսանկյունից: Ըստ նրա՝ թեև Իրանում առկա սոցիալական խնդիրները հուզում են նաև այնտեղ ապրող մեր հայրենակիցներին, սակայն այնտեղ անցկացվող ցույցերը ոչ մի վնաս չեն հասցնի իրանահայերին. նրանք կխուսափեն զանգվածային անկարգություններին մասնակցելուց: