Եթե Արցախը չկա, չի կարելի խոսել բանակցությունների մասին. Արմեն Ռուստամյան

ՀՅԴ խմբակցության ղեկավար Արմեն Ռուստամյանն այսօր խորհրդարանում լրագրողներին ասաց, որ Ադրբեջանը միայն մի ձևով է պատկերացնում հարցի լուծումը`ինքը ոչ մի զիջում չի անում, բայց հարցը կարգավորվում է: Ըստ նրա` Ադրբեջանն ամեն անգամ հանդիպումների ժամանակ բախվում է պատին և վերադառնում է իր ելակետին:

«Այսինքն` Ադրբեջանը հարցը փորձում է լուծել ուժային միջոցներով, պատերազմով, շանտաժի լեզվով, նա այլ բան չի տեսնում: Շատ հստակ է` կա'մ բանակցում ենք, կա'մ պատերազմում ենք: Ադրբեջանը փորձում է այդ երկուսը համատեղել, որն անհնար է: Բնական է, որ մեր կողմից էլ արձագանքը շատ հստակ պետք է լինի`մենք երկու դաշտում էլ պետք է աշխատենք, երկուսին էլ պետք է պատրաստ լինենք»,- ասաց Ռուստամյանը:

Դիտակմանը՝ Ադրբեջանի նախագահ Իլհամ Ալիևի հանդիպումից հետո Սերժ Սարգսյանը շատ լավատեսորեն էր տրամադրված, պատգամավորն արձագանքեց. «Ես անձամբ հանդիպմանը չեմ եղել, բայց կարծում եմ, որ լավատեսության հիմքն այն է եղել, որ հանդիպման ժամանակ Ալիևի պահվածքն այլ է եղել»:

Ռուստամանը շեշտեց, որ Ադրբեջանի նախագահը հանդիպումների ժամանակ միշտ այլ պահվածք է դրսևորում, իսկ հանդիպումներից հետո վերադառնում է իր ելման կետին, և Ադրբեջանի նման պահվածքին պետք է արձագանքի ԵԱՀԿ Մինսկի խումբը՝ համանախագահները պետք է հստակեցնեն իրենց դիրքորոշումը: «Համանախագահները պետք է սրանից եզրակացություն անեն, որ Մինսկի խմբի ունեցած մանդատի մեջ մտնում է նաև գլխավոր հարցը՝ ապահովել խաղաղ բանակցությունները, ինչը հիմա չի հաջողվում»,- նշեց պատգամավորը:

Ըստ նրա` հանդիպումները բանակցությունների հետ նույնականացնելը սխալ է: Նրա կարծիքով՝ բանակցությունն այն ժամանակ է, երբ բոլոր կողմերը ներկա են սեղանի շուրջը, սակայն բանակցող կողմերից մեկը՝ Արցախը, բանակցային սեղանի շուրջը չէ:

«Եթե Ղարաբաղը չկա, չի կարելի խոսել բանակցությունների մասին, էլ ուր մնաց, որ Ադրբեջանը պահանջում է սուբստանտիվ բանակցությունների վերաբերյալ գործընթաց: Այսինքն՝ Ադրբեջանը բանակցությունները ձախողում է, բայց խոսում է բանակցությունների օրակարգի մասին: Այս աննորմալ վիճակը պետք է դառնա քննարկման առարկա Մինսկի խմբում»,- եզրափակեց Ռուստամյանը: