կարևոր
11599 դիտում, 8 ամիս առաջ - 2023-08-09 13:05
Քաղաքական Իրավական

Սուրեն Մանուկյանի գործով դատական նիստը 40 րոպե ընդմիջվեց

Սուրեն Մանուկյանի գործով դատական նիստը 40 րոպե ընդմիջվեց

Տավուշի մարզի առաջին ատյանի ընդհանուր իրավասության դատարանի՝ Իջեւան քաղաքի նստավայրում դատավոր Սերժ Ռուշանյան նախագահությամբ քննարկվում է ՀՅԴ անդամ  Սուրեն Մանուկյանի խափանման միջոցը փոխելու միջնորդությունը։ Դատական նիստի ընթացքում պարզ դարձավ, որ մեղադրյալներից մեկը մեղադրական եզրակացություն չի ստացել եւ անհրաժեշտություն է առաջանում դատական նիստը հետաձգելու, քանի որ մեղադրվողը, ըստ օրենքի, երեք օր առաջ պետք է ստացած լինի մեղադրական եզրակացությունը, որպեսզի դիրքորոշում հայտնելու հնարավորություն ունենա, սակայն դատավորը որոշեց շարունակել դատական նիստը, ինչը փաստաբան Վրեժ Ներկարարյանի համար հիմք հանդիսացավ կարծելու, որ դատարանը կողմնակալ վերաբերմունք է դրսևորում։ «Կա ողջամիտ կասկած, որ դատարանը չի կարող անաչառ դատավարություն իրականացնել։ Եթե չենք ղեկավարվելու քրեական դատավարության օրենսգրքի պահանջներով, ցանկանում եմ ներկայացնել ինքնաբացարկի միջնորդություն»,- հայտարարեց փաստաբանն ու խնդրեց ժամանակ տրամադրել, որպեսզի գրավոր կազմի բացարկի միջնորդությունն ու ներկայացնի դատարան։ Դատավորը 40 րոպե ընդմիջեց դատական նիստը։

Հիշեցնենք, որ դեռևս 2022 թ. օգոստոսի 11-ից քրեական գործ էր հարուցվել և քրեական հետապնդում էր սկսվել ՀՅԴ Հայաստանի ԳՄ անդամ, 6-րդ գումարման ԱԺ պատգամավոր Սուրեն Մանուկյանի նկատմամբ: Վերջինս մեղադրվում է խմբի կազմում «Ազատ դեմոկրատներ» կուսակցության նախագահ Խաչատուր Քոքոբելյանի հորը առևանգելու և նրա որդիներից առանձնապես խոշոր չափերի գումար շորթելու մեջ։ Քրեական գործով Սուրեն Մանուկյանի նկատմամբ որպես խափանման միջոց է կիրառվել կալանավորումը, և 2022 թ. օգոստոսի 11-ից սկսած նա ազատազարկված է։

Հայտնենք նաեւ, որ Սուրեն Մանուկյանն իրեն առաջադրված մեղադրանքը համարում է շինծու, այն չի ընդունում և իրեն մեղավոր չի ճանաչում։  Փաստաբան Սերգեյ Ոսկանյանը բազմիցս հայտնել է, որ քրեական գործի նյութերում չկա որևէ ողջամիտ ապացույց, որը թույլ կտա հետևություն անել Ս.Մանուկյանի մեղավորության մասին։

Ի դեպ, Սուրեն Մանուկյանն  օրերս հայտարարել էր, որ դատական նիստի ընթացքում, հրապարակելու է 2  սկանդալային տեսանյութ, որոնք լույս կսփռեն այս քրեական գործի բոլոր հանգամանքների վրա։