Կառավարության ներկայացրած բոլոր օրինագծերն ԱԺ-ն ընդունեց

ԱԺ արտահերթ նիստում քննարկումներից հետո քվեարկության դրվեցին կառավարության ներկայացրած 6 օրենքներում փոփոխություններ կատարելու մասին նախագծերը, և բոլորն ընդուվեցին առաջին ընթերցմամբ: Եվ այսպես՝ «Պետական պաշտոններ զբաղեցրած անձանց սոցիալական երաշխիքների մասին» Հայաստանի Հանրապետության օրենքում փոփոխություն կատարելու մասին և «Հայաստանի Հանրապետության քննչական կոմիտեի մասին» Հայաստանի Հանրապետության օրենքում փոփոխություն կատարելու մասին օրենքներ նախագծերն առաջին ընթերցմամբ ընդունվեցին ձայների` 55 կողմ, 25 դեմ, 0 ձեռնպահ հարաբերակցությամբ:

«Հեռուստատեսության եւ ռադիոյի մասին» Հայաստանի Հանրապետության օրենքում փոփոխություններ եւ լրացում կատարելու մասին, «Պետական տուրքի մասին» Հայաստանի Հանրապետության օրենքում փոփոխություններ կատարելու մասին նախագծերն ընդունվեցին ձայների` 87 կողմ, 0 դեմ, 0 ձեռնպահ հարաբերակցությամբ:

Վարման կարգով ելույթ ունեցավ «Ելք» խմբակցության ղեկավար Նիկոլ Փաշինյանը և նշեց, որ իրենք կողմ են քվեարկում առաջին ընթերցմամբ, սակայն ունեն առաջարկություններ այս օրենքների հետ կապված, որոնք կներկայացնեն:

«Միջազգային պայմանագրերի մասին» Հայաստանի Հանրապետության օրենքում փոփոխություններ եւ լրացումներ կատարելու մասին նախագիծը 1-ին ընթերցմամբ ընդունվեց ձայների` 89 կողմ, 0 դեմ, 0 ձեռնպահ հարաբերակցությամբ:

«Իրավական ակտերի մասին» Հայաստանի Հանրապետության օրենքում փոփոխություններ կատարելու մասին օրենքի նախագիծը ընդունվեց ձայների` 89 կողմ, 0 դեմ, 0 ձեռնպահ  հարաբերակցությամբ:

«Հայաստանի Հանրապետության կառավարության կառուցվածքի մասին» և կից օրենքներ Հայաստանի Հանրապետության օրենքում փոփոխություն կատարելու մասին նախագիծը ընդունվեց ձայների` 58 կողմ, 11 դեմ, 119 ձեռնպահ հարաբերակցությամբ:

Նշենք, որ վերջին նախագծերի հետ կապված վարման կարգով ելույթ ունեցավ «Ելք» խմբակցության պատգամավոր Էդմոն Մարուքյանը: Նա նշեց, որ իրենք գրավոր առաջարկություն են ուղարկել կառավարություն, որը հնարավոր է դեռ չի քննարկվել, ուստի իրենք դեմ են քվեարկում նշված օրինագծերին, իսկ իրենց առաջարկներն ընդունվելու դեպքում, բնականաբար, կողմ կքվեարկեն: