Տարոն Մարգարյանն ունեցվածքի 90 տոկոսը բյուջեից է յուրացրել. Փոստանջյան

Հայտնել ենք, որ այսօր «Էրեբունի» թանգարանի մոտ կայացել է «Երկիր ծիրանի» կուսակցության հիմնադիր Զարուհի Փոստանջյանի ասուլիսը:

Անդրադառնալով հարցին, որ ինքը համարվում է էմոցիոնալ գործիչ և որոշակի շրջանակների կողմից լուրջ չի ընդունվում, Փոստանջյանը նշեց, որ քաղաքական պաշտոնում մարդ պետք է ունենա նաև էմոցիա:  «Առանց էմոցիայի` դու չես կարող հաղթահարել որևէ խոչընդոտ, իսկ Հայաստանում ամեն ինչ աղտոտված է, ուրեմն էմոցիաները շատ կարևոր են»,- ասաց նա:  

Իսկ թե ինչպիսի՞ քաղաքապետ կլինի Փոստանջյանը, նշեց, որ իրենք ունեն ծրագիր, բայց առաջին պայմանն այն  է, որ հանրային միջոցները չպետք է յուրացվեն: Փոստանջյանի կարծիքով` հանրային միջոցները չեն ծառայել իրենց նպատակին, իսկ գողություն չպետք է տեղի ունենա:  

Նա անդրադարձավ վերջերս մամուլում հայտնված` Տարոն Մարգարյանի ահռելի ունեցվածքի մասին հրապարակումներին: Ըստ Փոստանջյանի` Տարոն Մարգարյանի ունեցվածքի 90 տոկոսը Երևանի բյուջեից է յուրացված: «Բարձրաստիճան պաշտոնյան չի կարող կուտակել այդպիսի ահռելի հարստություն: Դրանք ձեռք են բերվել ապօրինի, որը պետք է իրավապահ մարմինների ուշադրության կենտրոնում լինի, իսկ նա անպատժելի է մնացել»,- հայտարարեց նա:

Փոստանջյանի խոսքով` այդպիսի պաշտոնյաների հիմնական արդարացումը լինում է, թե պապերից են ստացել ժառանգություն: Նա նշեց, որ Տարոն Մարգարյանն այդ ունեցվածքը ժառանգություն չի ստացել: