Հանքային ու կենսաբանական պարարտանյութերը ոչ թե ներկրել, այլ` արտադրել. վարչապետի հանձնարարականը

Կառավարության նիստից առաջ վարչապետ Կարեն Կարապետյանը հանձնարարական տվեց գյուղատնտեսության ոլորտում ներկրվող ապրանքները տեղական ապրանքով փոխարինելու վերաբերյալ: Ըստ նրա` դրա համար պետք է խրախուսել տեղական արտադրությունը, մասնավորապես` հանքային և կենսաբանական պարարտանյութերի, ինչպես նաև սերմնաբուծությունը:

Վարչապետը գյուղնախարարին հանձնարարեց մեկամսյա ժամկետում ներկայացնել առկա սելեկցիոն կայանների ու սերմնաբուծությամբ զբաղվող կայանների գործունեության խթանման վերաբերյալ առաջարկություններ, ըստ անհրաժեշտության` աշխատանքներում ներգրավել Հայաստանի ագրարային համալսարանի մասնագետներին:

Հանձնարարվեց տնտեսական զարգացման և ներդրումների նախարարին` ներդրումային ծրագիր ներկայացնել հանքային ու կենսաբանական պարարտանյութերի արտադրության վերաբերյալ:

«Այդ ոլորտը շատ շահութաբեր ու հասկանալի բիզնես է, ընթացքում խոսեք մասնավոր սեկտորի հետ: Չեմ կարծում, որ ներդրող չենք գտնի»,- ասաց վարչապետը: