Վարչապետի կարճ հանձնարարականը` "7,5 տոկոս"... ու որոշումն ընդունվեց

Ընդամենը կառավարության նախանցած նիստի ժամանակ էր, երբ ֆինանսների նախարար Դավիթ Սարգսյանը ներկայացնում էր Եվրաբոնդերի տեղաբաշխումից առաջացած միջոցները Հայաստանում օգտագործելու ուղղությունները,  ու արդեն երկու շաբաթ անց` կառավարության այսօրվա նիստում, այդ միջոցները  օգտագործելու ուղղությունների ու չափերի փոփոխության պահանջ առաջացավ:

Ֆինանսների նախարար Դավիթ Սարգսյանն այսօր կառավարությանը ներկայացրեց նախկին որոշման մեջ փոփոխություններ կատարելու նախագիծ, որով Եվրաբոնդերից առաջացած միջոցներից  «Հայաստանի փոքր եւ միջին ձեռնարկատիրության զարգացման ազգային կենտրոն» հիմնադրամին պետք է հատկացնել եւս 24 միլիոն 660 հազ. ԱՄՆ դոլարին համարժեք դրամ գումարի չափով բյուջետային վարկ: Ըստ որոշման նախագծի` վարկը պետք է ՓՄՁ ԶԱԿ-ին տրվեր 6 տարի մարման ժամկետով, տարեկան 8 տոկոս տոկոսադրույքով, առանց պարտավորությունների կատարման ապահովման միջոցի, վարկի հիմնական գումարը` սկսած 2016թ. հունվարի 1-ից հավասարաչափ եռամսյակային մարումներով, իսկ հաշվարկվող տոկոսները` սկսած 2014թ. հունվարի 1-ից եռամսյակային մարումներով իրականացնելու պայմանով:

Սակայն վարչապետը միանգամից կարճ հանձնարարեց` «7,5 տոկոս»… ու ֆինանսների նախարարի` «շատ լավ» արձագանքով որոշման նախագիծն ընդունվեց: