Միհրան Պողոսյանի` տարկետման իրավունքի մասին նախագիծը հանձնաժողովն ընդունել է

Այսօր ԱԺ պաշտպանության և անվտանգության մշտական հանձնաժողովը նիստ գումարեց, որի ընթացքում քննարկվեց ՀՀԿ-ական պատգամավոր Միհրան Պողոսյանի կողմից ներկայացված` «Զինվորական ծառայության և զինծառայողի կարգավիճակի մասին» ՀՀ օրենքում լրացում կատարելու մասին նախագիծը:

Հիմնական զեկույցով հանդես եկավ նախագծի հեղինակ Պողոսյանը և նշեց, որ եթե օրենքն ընդունվի, ապա հնարավոր կլինի օտարերկրյա դպրոցներում սովորող արական սեռի աշակերտներին տարկետում տալ: «Խոսքը վերաբերում է հանրակրթական ուսումնական հաստատություններում սովորողներին, որոնք չեն ավարտել դպրոցը, բայց ընդգրկվում են զորակոչային տարիքում»,- ասաց նա:

Պողոսյանի ներկայացրած նախագիծը հանձնաժողովականներն ընդունեցին միաձայն:

Նիստից հետո Պողոսյանը պատասխանեց լրագրողների հարցերին: Մասնավորապես հարցին`
նախագիծը  դրական եզրակացություն ստացավ հանուն իր երեխաների՞,  նա արձագանքեց. «Այո, հանուն մեր բոլորի երեխաների օրինագիծը դրական եզրակացություն ստացավ»:

Դիտարկմանը՝ օրենքի նախագիծը դրական եզրակացություն ստացավ հանուն իր՝ Լոնդոնում սովորող որդու, Միհրան Պողոսյանը չարձագանքեց և հեռացավ: