Ես զինվորն եմ Արթուր Բաղդասարյանի. Հեղինե Բիշարյան

«Ես նստած եմ երկու կնոջ կողքին, երկուսն էլ թելադրում են ինձ՝ տարբեր գաղափարներ: Ես կանանց ազդեցության տակ եմ գտնվում միշտ, ընտանիքում, միջավայրում»,- այսօր հայտարարեց  «Հայկական վերածնունդ» կուսակցության ղեկավար Արթուր Բաղդասարյանը ՀՎԿ կին ներկայացուցիչների հետ հանդիպման ժամանակ: Նրա խոսքով՝ կինը քաղաքականության մեջ բերում է ներդաշնակություն,  հանդուրժողականություն:

«Վաղվա  խորհրդարանում 25-30 կին է լինելու: Սսա տղամարդկանց ստիպելու  է ավելի հավասարակշիռ լինել: Եվ, ընդհանրապես, այնտեղ, որտեղ կան կանայք, այնտեղ կա երջանկություն, հաջողություն: Քաղաքականությունը չի կարող առանց կանանց լինել, կինը քաղաքականության մեջ  լուրջ ուժ է տալիս, նոր որակներ է տալիս»,- հայտարարեց Բաղդասարյանը, ապա շտապեց հեռանալ դահլիճից. «Շատ կանանց մեջ դժվար է, ես ուզում եմ գնալ»:

Լրագրողներից մեկի դիտարկմանը, թե, փաստորեն, ճնշմանը չի դիմանում, այսպես արձագանքեց.  «Կանանց ճնշմանը ոչ ոք չի կարող դիմանալ»:

Բաղդասարյանի՝ դահլիճը հապշտապ լքելուն հաջորդեց ՀՎԿ կարկառուն դեմք Հեղինե Բիշարյանի ելույթը: Նա ներկայացրեց իրենց նախընտրական ծրագրին վերաբերող մի քանի կարևոր դրույթներ, խոսեց կանանց՝ քաղաքականությունում ներկայացվածության, ակտիվություն դրսևորելու մասին, հայտարարեց, որ բոլորը պետք է  զինվորի պես պայքարեն հայրենիքի համար, ապա  հպարտորեն ասաց. «Ես զինվորն եմ Արթուր Բաղդասարյանի»:

Բիշարյանի խոսքով՝ լավ արդյունքի հասնելու համար պետք է գիշերուզօր աշխատել: «Մենք պետք է 24 ժամ աշխատենք, մենք ունենք երկիրը փոխելու հնարավորություն: Պետք է դառնալ զինվոր, ամեն ընտանիք մտնել, դուռը փակել,  պարտադրել լսել,  պետք է գաղափարական հեղափոխություն»,- հայտարարեց նա: