«Մուսան մի տեսակ լռում է». Տաճատ Վարդապետյանին չի մտահոգում ցուցակի 33-րդ համարը լինելը

ՀՀԿ խմբակցության պատգամավոր, անկուսակցական, «Վիրահայերի միություն» ՀԿ-ի նախագահ  Տաճատ Վարդապետյանը զբաղեցնում է ՀՀԿ համամասնական ցուցակի 33-րդ տեղը: Yerkir.am-ի հետ զրույցում նա ասաց, որ իր համար անակնկալ չի եղել ցուցակում ընդգրկվելու փաստը: «Նախապես պայմանավորվածություն չի եղել, պարզապես այդպես է հարմար գտել կուսակցական ղեկավարությունը»,- ասաց Վարդապետյանը:

Հարցին` չի՞ կարծում, որ 33-րդ տեղը ստորին հորիզոնական է, պատասխանեց, որ եթե դա անցողիկ ու լավ տեղ է, ուրեմն դրան է արժանի, իսկ եթե անցողիկ տեղ չէ, ուրեմն էլի դրան է արժանի: «Ես կարծում եմ, որ դա հետ ընկած տեղ չէ, ավելին` դա ինձ համար խորհրդանշական թիվ է` ես 33-ի նկատմամբ ներքին վստահություն ունեմ: Ապավինենք 33 թվի հաջողակությանը»,- կեսկատակ-կեսլուրջ ասաց Տաճատ Վարդապետյանը:

Հարցին, թե արդյո՞ք 33-րդ տեղով կարող է անցնել խորհրդարան, նա պատասխանեց, որ չի կարող ասել, «դա նոստրադամուսյան ժանրից է»:

Տաճատ Վարդապետյանն այն պատգամավորներից է, ով ոչ միայն սիրում է պոեզիան, այլև գրում է: Նա նշեց, որ վերջին ժամանակներս որևէ նոր բան չի գրել, «մուսան մի տեսակ լռում է»: Ըստ Վարդապետյանի` ապրիլի 2-ից հետո, հավանաբար, «մուսան էլի կայցելի»: Նրա խոսքով` գարունը թեև հապաղում է, սակայն գարնան մասին իր գրած բանաստեղծությունը  կարող է գարուն բերել:

«Գարուն էր, արևշող մի օր,

Երբ մենք լուռ հանդիպեցինք,

Մեր շուրջը խաղաղ էր, անդորր,

Եվ դու ինձ ամոթխած ժպտացիր,

Հիմա էլ գարուն է վառման

Հուշերս են գլխում նստած,

Ո՞ւր ես իմ սիրո թալիսման,

Մի՞թե հեռացար անդարձ»: