Ես ամբողջությամբ համակարծիք եմ Սերժ Ազատի Սարգսյանի հայտնած գնահատականին. Արտաշես Գեղամյան

ՀՀԿ համամասնական ցուցակում 18-րդ տեղը զբաղեցրած Արտաշես Գեղամյանը չի ցանկանում կարծիք հայտնել իր տեղի վերաբերյալ, այլ նախընտրում է մեջբերել ՀՀ նախագահի կարծիքը: Yerkir.am-ի հետ զրույցում նա ասաց. «ՀՀԿ համամասնական ու վարկանիշային ցուցակի գնահատականը ամենասպառիչ կերպով տվեց ՀՀԿ նախագահը, մեր երկրի նախագահը` Սերժ Ազատի Սարգսյանը, փետրվարի 18-ին ԵԿՄ համագումարի ժամանակ: Ես ամբողջությամբ համակարծիք եմ Սերժ Ազատի Սարգսյանի կողմից հայտնած գնահատականին»,- ասաց նա:

Մեր հարցին`սպասո՞ւմ էր, որ կհայտնվի ցուցակի 18-րդ տեղում, Արտաշես Գեղամյանը պատասխանեց. «Ես լրագրողի հետ եմ խոսում, ոչ թե` խոստովանահոր հետ, որ սիրտս բացեմ»:

Հարցին, թե ինչպե՞ս է պատրաստվում աշխատել նոր խորհրդարանում, արդյո՞ք նույն տեմպերով ու նույն մարտավարությամբ կաշխատի, պատասխանեց, որ իր գործունեության տեմպերն ամփոփված են 6 ստվարածավալ գրքերում, որոնք 7 լեզուներով թարգմանվել ու տարածվել են ԵԱՀԿ ԽՎ 56 անդամ պետությունների ղեկավարների ու պատվիրակների շրջանում: «Իսկ իմ գործունեության դատավորը ժողովուրդն է, ընտրողն է»,- հավելեց Գեղամյանը:

Իսկ հարցին, թե արդյո՞ք ՀՀԿ-ն այնքան ձայն կհավաքի, որ 18-րդ տեղում գտնվող Գեղամյանն անցնի խորհրդարան, պատգամավորը նշեց, որ այդ հարցը պետք է ուղղել ընտրապայքարին մասնակցող բոլոր այլ ուժերի, միայն ոչ` ՀՀԿ-ին: «Գուշակություններով ժամանակին զբաղվել են Վոլֆ Մեսինգը և Նոստրադամուսը: Իսկ ես քաղաքական գուշակություններով չեմ զբաղվում, որովհետև դա պարապ զբաղմունք է սովորական մահկանացուների համար»,- ասաց Գեղամյանը: